WILLEMSTAD.- Te ku ayera partido Un Kòrsou Hustu di señora Omayra Leeflang no por haña konfirmashon ku si Partido Hustu ta den òf for di gabinete Koeiman.

Ayera señora Leeflang a tene un rueda di prensa pa informá kon e proseso di ampliashon di gobièrnu a kana te ku ayera. El a bisa ku e tolda Lila, nunka a bati na porta pa drenta gobièrnu, pero nan a keda aserká. Ademas semper nan a keda disponibel pa drenta gobièrnu.

Si tira bista riba resultado di elekshon, señora Leeflang a bisa ku e tempu di partidonan grandi no tei, i pueblo a duna tur partido algu. Pueblo a duna partido Hustu un asiento loke nan ta masha agradesido p’e. Partido Hustu ke aportá na komunidat di Kòrsou, lo ta hustu i ta aktua ku sabiduria.

Dia 14 yanüari e partido a risibí yamada di sr. Kenneth Gijsbertha ku na nòmber di partidonan di koalishon ke a papia pa ampliamentu di gabinete Koeiman. Dia 15 yanüari e kòmbersashon a tuma lugá na sede di partido Hustu. A palabrá ku partido Hustu lo manda su deseonan pa sr. Gijsbertha.

Dia 16 yanüari partido Hustu a manda nan deseonan ku nan ke mira keda konsiderá i agregá den e programa di gobernashon i kual puntonan nan a kampañá kuné. Ta trata dje puntonan di entre otro empleo, bibienda, kas pa pueblo, penshonado i enseñansa. Ademas partido Hustu a bisa ku nan a pidi pa papia ku otro partidonan ku ta forma koalishon i no ku MAN so.

For di 14 febrüari, a garantisá sra. Leeflang, ku tur partido di koalishon ta di akuerdo pa partido Hustu drenta gobièrnu. For di e momentu ei sra. Leeflang a pidi partido MAN pa pone pretu riba blanku si tur partido di koalishon ta di akuerdo pe drenta gobernashon i tambe ku e ta haña kartera di enseñansa.

Dia 18 di yanüari señora Leeflang a haña un karta di señor Gijsbertha unda ta indiká ku e kartera di enseñansa t’esun disponibel ku tin. Den enseñansa tin e partido di deporte, i den e kapítulo aki e parti di ehekushon di tres fundashon SDK, FDOK i FDDK, lo bai kai bou di minister di finansa.

Dia promé febrüari partido Hustu tabatin kombersashon ku lider di partido MAN sr. Koeiman i tambe e presidente di partido MAN sr. Koots. Partido Hustu a bolbe pidi pa pretu riba blanku e haña konfirmashon ku partidonan koalishon ta di akuerdo pa Partido Hustu drenta gobièrnu i tambe ku kartera di enseñansa ta bai pa partido Hustu.

Señora Leeflang a bisa ku e konfirmashon riba papel, pasobra palabra so no por karga nada. Te ku ayera partido Hustu no a haña ningun konfirmashon ku e ta drenta gobièrnu. Señora Leelfang a konfirmá ku yega asina leu e lo t’esun na kabes di kartera di enseñansa i e number 2, ku ta sr. Gwendel Mercelina ta drenta parlamento p’e partido.