WILLEMSTAD.- Partido KEM, Kòrsou Esun Mihó, a base di e krísis ku a surgi den gabinete Rhugenaath, ta pidi esakinan, pa awe djaluna dia 22 di febrüari di aña 2021, entregá nan retiru na su ekselensia gobernadó di Kòrsou.

Anthony Godett miembro di KEM ta bisa ku e gabinete menshoná, no tin sosten di un mayoria den parlamento. A base di esaki gabinete Rhuggenaath ta wòrdu konsiderá komo un gabinete demisionario. Si e gabinete menshoná solushoná e krísis interno, e status di un gabinete demisionario ta finalisá.

Partido KEM, Kòrsou Esun Mihó, ta enfatisá akinan, si partidonan den parlamento, no logra solushoná e krísis den parlamento, gabinete Rhuggenaath, no mester warda te djabièrnè dia 19 di mart 2021, pa entregá su retiru na gobernadó, pa e ora ei numa risibí e status di un gabinete demisionario.

Partido KEM, Kòrsou Esun Mihó, NO ta spera, ku deliberadamente no ta tuma e paso demokrátiko i konstitushonal aki, djis pasobra Gabinete Rhuggenaath tin ainda algun desishon kontroversial, pa tuma riba kabes i kontra di E pueblo di Kòrsou!

Anthony Godett di KEM ta di opinion, si un minoria den parlamento ta haña, ku tin algu Kontroversial (proyektonan di lei), ta warda pa tuma desishon ariba, ta motibu sufisiente, pa atendé esaki finalmente, te na momento, ku un gobièrnu ta sintá atrobe, ku sosten di un mayoria den parlamento.

Partido KEM, pa finalisá, ta spera ku gabinete Rhuggenaath sa na respetá reglanan konstitushonal i demokrátiko.