Update: Gobièrnu mester duna klaridat

WILLEMSTAD.-Partido polítiko PIN a bai korte kontra di Curaçao Gaming Control Board despues ku basá riba un lei di 1909 a prohibí PIN di organisá un loteria pa rekoudá fondo. Korte a duna partido PIN rason den nan opheshon. Alvin Daal presidente di e partido ta di opinion ku ta Gobièrnu mester duna klaridat awor aki. Tin un elekshon na kaminda i partidonan polítiko mester rekoudá fondo pa kubri gastunan di kampaña polítiko.

PIN ta haña ku mester bini klaridat di parti di Gobièrnu. E klaridat aki ta importante pasobra no tin un lei ku ta regla finansiamentu di partidonan polítiko! Tur partido tin ku buska su mes manera pa kubri su gastunan i korektamente korte ta indiká ku e manera ku e situashon awor aki e ta no korekto.

Tin un veredikto den e kaso spesífiko di PIN, pero esei no ta solushoná e problema, pasobra awor aki tur partido polítiko tin mester di fondo pero no tin un manera reglá kon pa hasi esaki. Asta un premio di porta Gaming Board ta konsiderá loteria pues ta bira difísil pa generá fondo.

Tin un lei pa partidonan polítiko responsabilisá fondo, pero no tin lei kon pa yega na e fondonan. Alvin Daal ta mustra ku si un partido bende lòt, ta fásil pa kontrol ken a kumpra kuantu lòt. E situashon manera e ta awor aki ta hinka partidonan polítiko den skuridat. E kos aki ta malu pa demokrasia!

Ta p’esei PIN a manda karta pa Gobièrnu pa pidi klaridat. Ta Gobièrnu mester duna su punto di bista kon ta sigui di awor pa próksimo elekshon. Sea mester bisa ku ta sigui tolerá (gedoog) ku partidonan polítiko ta organisá lòt, bon kuné i otro maneranan pa generá entrada òf mester bini ku otro solushon pa finansiá partidonan polítiko. PIN ta nota ku Gaming Board ta trahando ku un lei di mas ku 100 aña bieu i di otro banda tin partidonan polítiko mes ta hasi hopi kos ku no ta yuda e kousa!

 

Partido PIN a gana kaso kontra Gaming Board

Loteria pa rekoudá fondo

WILLEMSTAD.-Korte di hustisia a dikta sentensia den e kaso entamá pa e partido polítiko PIN (Suzy Camelia-Römer) kontra Curaçao Gaming Control Board (GCB). Partido PIN a pidi Gaming Board 3 di aprel 2019 un pèrmit pa organisá un loteria. Esaki ta basa riba e Loterijverordening 1909. GCB dia 3 di mei 2019 a rechasá e petishon di PIN. E partido a organisá e evento pa rekoudá fondo. Den e kaso spesífiko a bende lòt i e ganadó lo a gana entrada pa presentashon di e buki di Michelle Obama ‘Becoming’ na Fort Lauderdale, Florida. Pero mester a para tur ya ku segun GCB e loteria lo ta ilegal.

Gaming Board riba 29 di mart 2019 a reuní ku PIN i a splika ku konforme e lei di 1909 e partido no por organisá loteria. A sigui diferente enkuentro entre PIN i GCB i finalmente ku un konseho di Direktorado di Asuntunan Hurídiko di gobièrnu GCB a mustra ku partidonan polítiko no ta outorisá, pa a base di e lei di 1909, organisá loteria pa generá fondo.

Den su desishon wes ta disidí ku PIN tin rason den nan ponensia i ta disidí ku ta destruí e desishon di 3 di mei 2019 i ta indiká GCB komo esun ku mester kubri gastunan di proseso i tambe griffierecht na PIN. Mas detaye den edishon di EXTRA.

LAGA UN KOMENTARIO

Please enter your comment!
Please enter your name here