WILLEMSTAD.- Presidente di MFK Sithree van Heydoorn a bisa ku su partido ta traha duru pa yega na un akuerdo di gobernashon. ‘Den un òf dos siman nos ke ta kla ku esaki.’ Van Heydoorn a splika ku pa e siman aki e partidonan a plania pa bin huntu ku 12 diferente grupo di trabou. Pero pa motibu di situashon di COVID-19 a skohe pa kada partido traha riba e parti di su ministerionan. Segun Van Heydoorn ‘awe (djabièrnè 9 di aprel) 12 or di mèrdia nos komo MFK lo sinta huntu pa chèk kon leu nos ta i si tur kos ta kla pa bai Partido Nashonal pa tende nan komentario.’ Banda di esei e partidonan lo sinta huntu pa papia tokante tópikonan di COVID-19 i COHO. ‘Si tur kos ta manera nos tin planiá tur kos ta kla promé ku fin di luna.’
E partidonan tin komo deseo ku dia 11 di mei, ora parlamento nobo lo wòrdu instalá, gobièrnu nobo por wòrdu instalá tambe. ‘Esaki ta nos deseo, pero esaki no ta den nos man.’ Van Heydoorn a splika EXTRA ku for di djaweps 5 or di atardi nan no a tende nada mas di gobernador. Manera ta konosí djamars último informadornan Rutsel Martha i Chester Peterson a entregá resultado di nan tarea na gobernador Lucille George-Wout. Van Heydoorn a spera ku despues gobernador lo invitá lidernan di e partidonan ku ke forma un gobièrnu nobo, pa asina e trayekto di formashon por sigui ku nombramentu di formadónan. Segun Van Heydoorn MFK lo sugirí gobernador pa Martha i Peterson por sigui komo formadó. ‘Pero te ainda nos no a tende nada mas. Ku ta nifiká tambe ku nos no por kuminsá ku trayekto di screening di e posibel ministernan tampoko. Nos intenshon ta ku nos por kuminsá 11 di mei, pero esaki no ta kompleto den nos man.’
Van Heydoorn a splika ku lòs for di e trayekto di formashon bou di guia di gobernador Lucille George-Wout ‘MFK i tambe PNP ta sigui i traha duru ku nan trayekto pa yega na un akuerdo di gobernashon promé ku fin di aprel.’
Manera ta konosí partidonan MFK i PNP despues di elekshon di dia 19 di mart a splika hopi lihé ku nan ta dispuesto pa forma e siguiente koalishon.
Dos dia despues di elekshon e partidonan a firma un akuerdo di disponibilidat. Un siman despues nan a yega na un akuerdo tokante repartishon di e diferente ministerionan.