Akuerdo ku énfasis riba transparensia i desaroyo sosial ekonómiko

WILLEMSTAD. - Ayera Partidonan Movementu Futuro Kòrsou (MFK) i Partido Nashonal di Pueblo (PNP), a firma un akuerdo riba repartishon di ministerionan. Ku e firma aki por bisa ku partidonan ta di akuerdo pa yega na un koalishon ku mester sinta no muchu despues di dia 11 di mei ora ku parlamento nobo sinta.

E repartishon ta 6 ministerio pa MFK i 3 ministerio pa PNP. Punto di salida ta pa yega na un gobièrnu transparente i ku hopi énfasis riba desaroyo ekonómiko na benefisio di pueblo di Kòrsou.

Presidente di MFK sr. Sithree v. Heydoorn a trese ayera dilanti ku a skohe pa e modelo di negoshá aki, ta pa evitá pèrdèmentu di tempu. Basá riba eksperensianan anterior, t’asina ku partidonan ta negoshá riba programa di gobernashon i ora yega repartishon, kos ta bai robes. Pues pa evitá e situashon aki, a skohe pa atendé repartishon di ministerio promé ku atendé e programa di gobernashon. Pero e repartishon ta basá riba e akuerdo di disponibilidat ku dia 21 di mart a keda firmá.

Den e fase ku ta bai kontinuá, lo atendé problemátika nan manera COVID, COHO, Landspakket i leinan ku MFK a entregá na parlamento. E modelo aki ta pa esnan ku lo bai okupá e puestonan ministerial, for di awor aki por kuminsá kana ku e proseso pa ora ku yega dje leu ei ku nan ta bai traha.

Repartishon:

Pa loke ta trata repartishon di ministerionan t’asina ku MFK lo haña:

Asuntunan General, Finansa, Hustisia, Tráfiko transporte i Planifikashon Urbano, Salubridat Públiko i Enseñansa Kultura i Deporte.

MFK lo haña Presidente di Parlamento, Minister Plenipotensiario i Suplente na Hulanda.

Partido PNP lo haña e ministerionan:

Desaroyo Ekonómiko, maneho di Gobernashon, Planifikashon i Servisio Urbano i Desaroyo Sosial Labor i Bienestar.

PNP lo haña Vise Presidente di Parlamento i tambe Minister plenipotensiario na Merka.

E akuerdo aki ta bisa tambe ku ministernan a akordá ku nan lo traha huntu riba un base di konfiansa mutuo kaminda lo duna balor na transparensia na pueblo di Kòrsou, p’asina por realisá un desaroyo sosial ekonómiko ku ta na benefisio ta kada siudadano di Kòrsou.