WILLEMSTAD.-Partido Kumun a hasi entrega di  nan lista pa partisipá na elekshon. Lider di Komun Luigi Faneyte a splika un bia mas ku e aspekto finansiero debil di Kòrsou kombiná ku situashon ekonómiko i sosial malu ta motibunan prinsipal pa kiko Kumun a lanta i ta bai partisipá na elekshon pasobra no por keda para na banda. Segun Faneyte, ta un derecho ku e pueblo aki tin di integrá kompletu den e forsa mas grandi ku ta Ulanda. Esei lo garantisá mihó kontrol finansiero i maneho ku ta garantisá kupo di trabou. Kumun ta bai pa UPG i no manera Boneiru ku ta LPG. Kumun ke integrashon den Oropa i no solamente den Ulanda so.

E di dos agrupashon polítiko ku a entrega nan lista ta Kòrsou di Nos Tur. E lider Amparo dos Santos a hala atenshon di liderazgo di Konseho Supremo Elektoral(KSE) pa tene kuidou ku korupshon den elekshon. Dos Santos ta bisa ku e ta kontentu ku KSE a skucha pasobra e ta na altura ku e buzonnan pa depositá  voto tin un banda transparente. E dirigentenan di Kòrsou di Nos Tur no kier a papia ku prensa i a sali bai for di e sala na WTC.

E siguiente tabata Pueblo Soberano ku Ben Whiteman komo lider. Whiteman a duna di konosé ku nan a entrega un lista ku 10 kandidato. E ta kere ku e eksigensianan ku nan a pone ta hopi haltu i banda di esei e tempu ku nan kier a rekluta hendenan nobo, tabatin difikultat debí na Covid.