E findishi ta kuminsá mayan djadumingu 4 òktober

WILLEMSTAD.- Ainda tur hende por partisipá na e findishi “Help4Beirut”. Ta trata di un findishi ku obranan di arte òf merkansia di gran balor ku artistanan òf kompanianan a pone disponibel pa asina generá fondo pa yuda Beirut despues di dos eksploshon kua tuma lugá na kuminsamentu di ougùstùs di e aña aki.

Mundu a keda di shòk despues di tuma nota di dos eksploshon fuerte ku a tuma lugá na un haf di Beirut ku a kousa morto di 73 morto i kasi 4000 hende heridá. E tempu ei asta a pidi Konseho General di Seguridat Nashonal di Nashonnan Uni pa deklará e área na Beirut komo zona di desaster.

Na Kòrsou entretantu a prepará un findishi ku 34 piesa di arte òf merkansia di gran balor. Por mira e merkansia i obranan di arte na Landhuis Bloemhof pero mester tene kuenta ku distansiamentu sosial loke ta enserá ku no por permití mas ku 4 hende pareu den e lugá.

E findishi mes ta kuminsá tuma lugá djadumingu, esta mayan 4 di òktober online i ta sigui te dia 18 òktober.

Entre e bunita piesanan di arte tin Iggy Iguana di Carel Rink, Lebanees Korasolena di Haithem Metry. Diferente chichi di Serena Israel, pinturanan di Andre Nagtegaal tambe, pinturanan di Jean Girigorie i hopi otro mas.

E findishi ta pa un bon kousa, ademas e merkansia i piesanan di arte sigur ta sumamente balioso.

https://www.franksauctions.com/collections/help4beirut