ROTTERDAM.- E organisashon dje di 39 máratòn di Rotterdam ta sumamente tristu despues ku a drenta informashon ku un di e partisipantenan a muri den hospital mas o ménos 5’or di atardi (ora ulandes). E organisashon den un informe ofisial ta bisa ku nan ta ekstendé nan mes profundo palabranan di pésame na famia di e víktima.

Tabata un bista bunita atrobe pa mira un multitut riba Erasmusbrug na Rotterdam. Informashonnan ta mustra ku mester a duna asistensia na tres persona. Respetando deseo di e famia e organisashon no ta duna mas detaye di e persona ku a fayesé.

Te na e momentunan aki no a indiká si e víktima ta un atleta hòmber òf muhé entre e mas ku 16 mil partisipantenan na e evento. Outoridatnan ta indiká ku no ta prome bia ku un víktima ta muri durante òf despues di un máratòn na Rotterdam. Foto NOS