WILLEMSTAD. - Djaluna tras di lomba un pasahero femenino a trata di subi avion ku un feto den un bòter di pindakas   mesklá den alkohòl, pa konserv’é.

For di fuentenan di kuerpo di duana EXTRA a komprondé ku durante un kontròl, nan a konstatá ku tin algu straño den un tas di un di e pasaheronan.

Esaki a hasi ku a realisá un investigashon mas profundo di e loke ku ta mustra straño i pa nan sorpresa a  konstatá ku den un bòter tabatin un feto hopi leu desaroyá. Ta por a mira kaba ku ta trata di un yu hòmber.

Ora ku a puntra e pasahero femenino kiko e ta hasi ku un feto den su poder, el a indiká, ku ta un “miskraam” el a haña i e ta ke a warda su feto.

Pero e situashon tabata un konfuso pa outoridatnan uniformá na Hato.

Pero e loke ku a trese un buèlta den henter e situashon, ta  ora ku duana a disidí di hasi un kontròl na kurpa di e pasahero, a konstatá ku e pasahero tabatin droga den su BH skondí pa bai Ulanda.

Esaki a pone ku a konfiská e droga i tambe e feto pa wak kiko ta bai hasi ku esaki, miéntras e pasahero a haña un “dagvaarding” pa e presentá den sala di korte pa e responsabilisá su mes pa e droga ku e tabatin den su poder. E echo ku e peso di e droga tabata bou di 2 kilo i mei, e pasahero no a keda detené.

Manera ta konosí, kontrali ku na Ulanda, aki na Kòrsou un mula ku tin bou di 2 kilo i mei di koka den su poder, no ta bai prizòn, pero ta bai kas normal i keda pendiente di su kaso.

Esaki na konta solamente pa e “first offender” nan.

Na Ulanda si ta sera un mula pa kualke kantidat di droga ku e tin den su poder.

No ta konosí kiko ta bai sosodé ku e feto, si ta akto kastigabel òf si mester tabatin un forma pa transportá un feto.

EXTRA a trata di haña mas informashon di e kaso remarkabel aki, pero no a logra den nos intentonan.