WILLEMSTAD.- Durante infrakshon di tráfiko, korte di promé instansia a trata kaso di un dama di (54) ku tabata sintá komo pasahero den un vehíkulo, pero no tabatin faha di seguridat bistí na momento ku polis a para e outo.

Polisnan durante un kontròl a para e vehíkulo ku e dama tabata aden, pa asina kontrolá si tur kos tabata na òrdu. E dama pasahero a haña but pa falta di kumplimentu ku regla.

El a presentá den sala di korte pa motibu ku e no tabata di akuerdo ku e but.

El a splika hues ku e ta un persona ku ta sufri di preshon haltu i hiperventilashon i no por bisti e faha, pa motibu ku esaki ta hasié hopi “sofoká”.

E dama a bin ku un karta di dòkter ku el a laga traha, kaminda e dòkter ta splika ku bèrdat e dama ta konosí ku e problemanan ariba menshoná.

Tambe dòkter a splika e problema di malesa ku e señora a menshoná.

Fiskal a bisa di ta tene kuenta ku esaki pero ku e dama mester tabatin e asina yamá “ontheffings brief “  ora polis a par’é, pa mustra dikon e no por bisti e faha.

Segun fiskal e dama ta haña un but di 100 florin kondishonal pa asina e keda atvertí ku e no por kore sin  e faha bistí miéntras tantu e no regla e pèrmit pa ku esaki.

Hues ku mester a tuma un desishon a bai di akuerdo ku fiskal i a splika e dama ku tur esaki ta pa su mes bon.