WILLEMSTAD.- Durante kasonan di infrakshon di tráfiko, e bia aki un pasahero a bin korte pa reklamá e but ku el a haña.

Ta trata di un dama  ku ta keda akusá di no tabatin su faha di seguridat bistí na momento ku polis a para e shofùr.

Polisnan durante un kontròl  di tráfiko a para e vehíkulo ku e dama tabata aden, pa asina kontrolá si tur kos tabata na òrdu.

E dama pasahero a haña but pa falta di kumplimentu ku regla.

E dama a presentá dilanti hues pa motibu ku e no tabata di akuerdo ku e but.

El a splika hues ku e ta un persona ku ta sufri di hiperventilashon i no por bisti e faha, pa motibu ku esaki ta hasié hopi  hanshá.

Hues a splika e dama ku e mester kana ku un karta di dòkter ku ta indiká su malesa , ya outoridatnan ta tene kuenta kuné.

Fiskal  a duna di konosé ku but pa faha di seguridat ta 300 florin, pero den e kaso aki e ta tene konsiderashon i ta dun’é un but di 100 florin kondishonal komo atvertensia.

Fiskal a rekomend’é pa e bai  su dòkter pa e haña e karta konserní pa bistimentu di faha seguridat.

Hues den su desishon a bai di akuerdo ku  e demanda di fiskal .