WILLEMSTAD.-E publikashon den EXTRA awe mainta ku ta indiká ku tin indikashon médiko di pashènt ta algu sumamente serio. E ta asina serio ku minister enkargá ku Salubridat Públiko, Medio Ambiente i Naturalesa sra. Susanne Camelia-Römer a duna enkargo na inspektor di Salubridat a kuminsá un investigashon.

Manera EXTRA a informá den e edishon di awe mainta, un persona ku ta usa e nòmber jeanylagun@gmail.com lo a saka informashon konfidensial di malesa di hendenan ku el a trata. Un total di 193 persona. Investigashon di EXTRA ta mustra ku aparentemente e persona no ta un profeshonal médiko pero mas bien un ‘healer’. Nos a sigui investigá i a komprondé ku for di 2011 Korsou no tin mas e loke nos tabata konosé komo ‘Raad voor de Volksgezondheid’. E último vershon di e konseho ei a stòp di funshoná na 2011, despues ku gobièrnu a pone e lei ku ta trata ‘Raad voor de Volksgezondheid’ riba e lista negativo na 10-10-10.

EXTRA a sigui buska pa haña klaridat kiko esnan perhudiká por hasi pa defendé nan kousa. Hustisia ta mira mas bien den ambiente sivil ku lo por tuma sierto akshonnan.

E pregunta grandi ta, kon bini e persona a haña e informashon di e pashèntnan? Ta ken a duna e persona e informashon? A kaso e persona mes? E ‘healer’ no ta un médiko i komo tal no por dun’é informashon i komo tal e kaminda pa kana lo ta bai entrega un keho na Inspekshon di salubridat, asina un profeshonal rekonosé riba e tereno médiko a deklará na EXTRA.

https://extra.cw/informashon-mediko-di-kasi-200-pashentnan-plama-riba-kaya/