Mas urólogo pa traha den hospital

WILLEMSTAD.-Despues ku e spesialista dr. Isa a bati bèl indikando ku e mester limitá e kantidat di pashènt ku e por sigui atendé, debí na e “productieplafond” di SVB, awor ta pashèntnan ku no por haña kuido ta rabia ku e situashon. EXTRA a chek ku e urólogonan pa tende si akaso por a haña un reakshon di e ministerio konserní, pero e kontesta ta ku no a bini niun reakshon. E urólogonan a tuma nota ku e direktor di SVB ta indiká ku hospital CMC lo kontratá mas urólogo pa traha den CMC.

Investigando mas aleu EXTRA a komprondé ku tin 3 kandidato ta bini for di Colombia. Tambe ta asina ku a tuma un urólogo ulandes hopi hóben, esei ta bini pa un aña. Pa e urólogonan no ta komprendibel d kon awor si ta posibel pa buska e spesialistanan for di Colombia.

EXTRA ta bon konsiente di e preokupashon serka pashèntnan i den e kuadro ei a sigui analisá e situashon. Resientemente por a tende minister di Salubridat deklará den Staten ku e situashon di CMC ta fèrfelu i ku e instituto su situashon finansiero ta delikado. Den e kuadro aki EXTRA a puntra direktor di SVB kon ta pará ku e posibilidat pa buska urólogo. Riba esaki Philip Marie a duna di konosé ku e spesialistanan ku hospital CMC tuma den servisio ta SVB ta paga nan direktamente. Ademas ya kaba SVB a haña informashon ku CMC ta reglando pa tuma dos òf tres urólogo den servisio.