WILLEMSTAD.- Djaluna mainta trempan, bomberonan a keda dirigí pa Kaya Pachi Jan Bakhuis na Oost Jongbloed despues di a risibí informashon ku tin hopi huma ta sali for di un edifisio. Na nan yegada na e sitio a konstatá hopi huma saliendo for di un misa i kandela ku ya a kuminsá kima parti di e interior di e misa.

EXTRA a hiba un kombersashon ku Pastor di e iglesia Sr. Bruno, ku a reakshoná riba e kaso lamentabel aki. E pastor a deklará na EXTRA ku e mainta di e kandela, un lider di e misa a pasa i tuma nota di un bentana ku tabata kibra. E lider a drenta den e kura i a bai habri un porta pa asina wak kiko ta pasando. Ora e lider a habri e porta, ya paden tabata yen di huma i kandela a kuminsá riba e stech. E momentu ei e lider a aktua hopi lihé i a pone outoridat i demas miembronan di e iglesia na altura.

Na yegada di bombero i polisnan na e sitio a kuminsá paga e kandela. E momentu ei a tuma nota di un bòrchi di karton ku tabatin un mensahe ariba ku a keda di spùit kolo kòrá. Refiriendo na esaki e pastor a sigurá na EXTRA ku ni e, ni su liber òf miembronan no tin problema ku hende.

E ta na Kòrsou pa mas ku 20 aña kaba. Promé ku esei e tabata pastor na otro sitionan tambe i nunka a hañ’e den problemanan manera esaki òf similar. “Na nos iglesia nos ta prediká evangelio, i tin hende ku ta kontra di esei. E hende ku a hasié kisas ta kontra di evangelio òf anti Kristu”, e pastor a indiká na EXTRA.

E pastor a indiká ku e tristu ta ku nunka e segura e edifisio. No a hasi esaki debí ku nunka a pensa ku lo haña nan den e situashon aki. Tabata un deskuido di nan mes.

Finalmente e pastor a indiká ku e lo bisa esun responsabel ku Señor ta stim’e i ku nan ta resa pa e persona aki ku e deseo ku un dia e konosé e Kristu ku nan ta sirbi. Hopi otro pastor a sali i duna man, pues lo tuma un tempu pa nan por lanta bek.