WILLEMSTAD.- Asosashon di Pastornan Kristian (APK) ta profundamente preokupá ku e suseso di e siman aki kaminda a pega un iglesia na Jongbloed na kandela.

Djaluna último na Jongbloed, a pega edifisio di iglesia na kandela i a kousa hopi daño parti paden. Asosashon di Pastornan Kristian ta desaprobá enérgikamente tur asalto kriminal riba edifisionan di iglesia. Edifisio di iglesia ta ser konstruí ku hopi ofrenda i sakrifisio di miembronan ku a duna nan ofrenda finalmente na Dios.

P’esei e edifisio ta Dios su propiedat bou di maneho di Su siervonan.

Iglesia ta símbolo i monumento di moralidat i speransa den un pais, kaminda tur famia por haña sosten, konsuelo, apoyo i partikularmente konseho den tempunan difísil. Bida normal ta difísil kaba.

Asosashon di Pastornan Kristian ta habri pa komunidat haña enkurashamentu i diferente kurso i charla pa edifiká hende, famia i komunidat. Ta kon por pensa mes di ke kima, hòrta (manera a pasa ku Misa na Lagun) i asta menasá di morto pa ku un instituto asina noble. Dios, i nos Lei tambe, ta kondena aktonan asina aki.

‘Nos lo resa pa esnan tras di e akto aki arepentí i kombertí. Nos ke pidi komunidat sigui yuda protehá i vigilá boso iglesianan lokal i pa tur pastor kòrda aktivá alarmanan i pone èkstra seguridat.  Ku nos bon Dios sigui laga nos kongregá i biba trankil na nos dushi Kòrsou’, segun e asosashon.