WILLEMSTAD.-E kantidat áwaseru ku a kai for di mardugá te awe mainta a pone ku outoridatnan a tuma e desishon pa sera Pater Euwensweg un ratu pasá. Manera EXTRA a informa anteriormente, Kòrsou ta hañando bastante áwaseru i tin basta área ku tin molèster pa e kantidat di awa.

Tin vários área i kaya ku no por manehá e gran kantidat di áwaseru ku a kai den un periodo kòrtiku. Pater Euwensweg ta unu ku kada bia ku áwaseru kai e ta bira un pisina, i ta dura un ratu pa e awa bai laman. Pa hopi aña a bisa ku mester yega na e sistema kaminda por guia e awa na sitionan unda e no ta kousa problema, pero si ta duna e awa chèns pa drenta nos tera.

Den área di Emmastad tambe EXTRA a tuma nota di bastante áwaseru i asta tin palunan grandi ku a kai. Un bia mas e rekomendashon pa sea kouteloso, sinembargo bida mester sigui.