Manera EXTRA a informa for di 15 di oktober último

WILLEMSTAD.- Entrante 29 di Òktober próksimo Sr Patrick Newton lo okupá e funshon di gerente interino di Refineria di Kòrsou (RdK). Tal manera EXTRA a informa for di 15 di oktober último Patrick Newton a keda apuntá komo gerente interino di RdK dor di Hunta di Komisario di RdK pa remplasá Sr. Marcelino (Chonky) De Lannoy kende riba e mesun fecha ta sali for di servisio di RdK. Sr. Newton lo kuminsá laborá na RdK for di awor pa traha huntu ku Sr De Lannoy te na e momentu di transishon pa duna kontenido na un traspaso harmonioso di e maneho di RdK.

Manera EXTRA a indiká RdK no ta un kompania deskonosí pa Newton. Te ku resientemente e tabata forma parti di e Project Management Organization (PMO) ku tabata enkargá ku búskeda di un partner stratégiko pa manehá i operá nos refineria. Sr Newton a traha den pasado na refineria den e área di desaroyo di proyektonan i ku su eksperensia den PMO a konosé e merkado petrolero.

Sr. De Lannoy ta tuma despedida di RdK despues di a dirigí e kompania pa 3 aña.  Un enkargo partikular tabata e búskeda pa un partner stratégiko pa nos fasilidatnan petrolero, kual ta kontinuando. Banda di esaki Sr. De Lannoy a pone base na reglamentu di kuenta ku PDVSA/Isla, operashon di e refineria komo terminal, rekoudá fondo for di kréditonan akumulá serka debedornan i tambe e futuro desaroyo di e terenonan ku anteriormente tabata forma parti di e refineria.  Hunta di Komisario di RdK ta gradisí Sr. De Lannoy pa e trabou desplegá i ta deseá Sr. De Lannoy tur kos bon pa futuro. Di e forma aki ta pèrkurá un transishon harmonioso ku e ophetivo pa salbaguardiá e mandato di Gobièrnu pa logra reaktivá aktividat i operashon di nos refineria i Bullenbaai.

Susesor Chonky den RdK no ta deskonosí pa e kompania | èxtra (extra.cw)