WILLEMSTAD.- E inisiativa di lei pa trese kambio den e lei di suèldu mínimo no ta eliminá e deskriminashon di edat pa esnan ku ta kobra suèldu mínimo hubenil. Esaki ta un di interogatorionan mas grandi ku parlamentario pa partido PAR, Ana Maria Pauletta tin relashoná ku e inisiativa.
E inisiativa di lei ta proponé pa eliminá suèldu mínimo hubenil pa hóbennan di 18, 19 i 20 aña i pa nan tambe kuminsá kobra e suèldu mínimo máksimo di NAf. 11,28. Pauletta ta bisa alabes ku tantu Konseho di Konsulta, RvA i Konseho Sosial Ekonómiko, SER den nan konseho a trese diferente punto di preokupashon, pero e no por mira ku a inkorporá e konsehonan aki den e inisiativa di lei.
Na opinion di Pauletta eliminando e diferensia den pago di esnan di 18 te ku 20 aña kompará ku esun di 21 aña ta trese un deskriminashon mas grandi pa e hóbennan di 17 i 16 aña ku ta kobra e suèldu mínimo hubenil. “Tin un buraku awor di 4 florin pa ora entre e suèldu mínimo ku hóbennan di 16 i 17 aña ta gana kompará ku loke un hóben di 18 aña ta gana.”
Pauletta ta pensa ku kisas mas bien mester eliminá e suèldu mínimo hubenil pa tur edat, pues ku hóbennan di 16 i 17 aña tambe ta gana NAf. 11,28 pa ora òf ku ta hisa e porsentahe di e suèldu mínimo ku nan ta gana di 65 porshento i hasié 75 porshento por ehèmpel. “Eliminando e suèldu mínimo hubenil solamente pa hóbennan di 18 te ku 20 aña ta buta ku a kita un parti di ‘gilding scale’ ku tabatin di e suèldu mínimo ku tabata subi gradualmente di 16 pa 20 aña.”
Ta pa e motibu e parlamentario ta haña ta bon pa tende tur stakeholder manera gobièrnu i sektor komersial promé ku sigui ku tratamentu di e inisiativa di lei. “E punto prinsipal p’ami ta ku den e inisiativa di lei ku tin riba mesa no ta yega na un eliminashon kompletu di e deskriminashon di edat.”
Pauletta ta teme alabes ku e inisiativa di lei por okashoná ku doñonan di trabou ta baha e kantidat di ora ku e hóben di 18, 19 i 20 aña ta traha ku e konsekuensia ku e lo keda kobra e mesun salario fin di luna. Tambe e parlamentario ta ku doñonan di trabou ta kuminsá kontratá hóbennan di 16 i 17 aña ku ta kobra 65 porshento di suèldu mínimo ku ta 4 florin ménos pa ora na lugá di hóbennan di 18, 19 i 20 aña.
