WILLEMSTAD. - Te ku ayera anochi lat, despues di un reunion, Gobièrnu a disidí entrante awe djamars 26 di yanüari, tur pasahero ku ta biaha pa Kòrsou for di Aruba, mester hasi un PCR tèst obligatorio, máksimo 72 ora promé ku biaha pa Kòrsou.
Pa pasaheronan ku ta bula promé ku djabièrnè 29 di yanüari i no ta logra hasi e PCR tèst promé ku nan buelo, mester hasi un PCR tèst ora ku nan yega Kòrsou.
Den e kaso aki, e pasaheronan mester keda den karentena obligatorio te ora haña resultado di e PCR tèst.
Gobièrnu di Kòrsou ta duna di konosé tambe ku biaha pa Aruba solamente si ta esensial.
E medidanan ariba menshoná ta bin despues ku Gobièrnu di Aruba a informá ku nan a risibí konfirmashon ku den e resultadonan di tèstnan di COVID-19 ku nan a manda Ulanda, a haña e variante di Inglatera.
Tim di Krísis di Kòrsou ta den kontakto ku Aruba pa por risibí mas informashon asina esaki ta disponibel.
Teniendo kuenta ku e último desaroyonan rondó di COVID-19 na Aruba, Gobièrnu di Kòrsou ta konsehá, te un próksimo aviso, pa biaha pa Aruba solamente si ta esensial.
E konseho aki ta introdukshon di un PCR tèst pa pasaheronan ku ta biaha for di Aruba, ta fungi komo medidanan preventivo pa Kòrsou.