WILLEMSTAD.- Bos di Hubentut ta toka e tema di Pedofil. No ta un tema ku fásilmente ta papia di dje pero nan a trese un mensahe, kaminda nan ta splika kiko ta un pedofil.

Den boka di pueblo, yamá abusador òf pedofil. Pedofil ta derivá for di e palabra ‘paraphilia’, kual ta deseonan seksual ku ta apnormal ku ta enserá aktonan ekstremo i peligroso.

Un persona ku tin urgensia i/òf fantasiá seksual dirigí na mucha ku ainda no a yega den e fase di pubertat ta wòrdu konsiderá un pedofil.

E motibu dikon un pedofil tin atrakshon aki pa mucha ta pasó e mucha ta wòrdu konsiderá inosente, i no a forma físikamente ainda. E fantasíanan akí por inkluí potrèt i vidio pornográfiko òf tambe ku e persona tin paña, i karson di abou di un mucha. Esei kiermen ku un pedofil ta dirigí eksklusivamente na mucha.

E persona ku ta hasi e aktonan akí por ta hende muhé òf hende hòmber, ku tin e edat di 16 aña òf mas òf tin un diferensia di 5 aña entre e víktima i e persona. Tin bes un pedofil tin atrakshon pa mucha hòmber, òf mucha muhé so, pero tambe por pasa ku e ta sinti atrakshon pa mucha hòmber i mucha muhé.

For di aña 1968 pedofilia ta wòrdu konsiderá un trastorno mental. Esei ta nifiká, ku e persona por hasi terapia ku ta siñ’é manehá e urgensia ei sin aktua riba nan. Tin bes, un sikiater por asigná un remedi pa yuda redusí e gana seksual di e persona. Tambe un pedofil por haña tratamentu terapéutiko pa minimalisá e urgensia akí.

No ta tur pedofil ta un hende ku ta kometé abusu seksual di mucha. Esei ta nifiká ku un persona por tin e gana i fantasia akí, pero no nesesariamente ta abusá òf mishi ku un mucha. Un pedofil seksual ta aktua riba e urgensianan aki.

Un persona ku ta abusá di mucha, ta wòrdu yamá un abusador di momentu. Su focus ta riba e akshon seksual i e ta probechá di e momentu, pasó edat no ta su focus. Ta hopi importante pa distinguí e dosnan akí for di otro.

Un pedofil por biba un bida dòbel masha normal. Esei ta nifiká ku e persona ta bai traha mainta i laborá manera un hende normal, pero tambe tin su fantasiá i urgensianan dirigí na mucha. Tin bes e personanan akí ta abusá di nan poder, i hasi loke nos ta yama ‘grooming’. E persona ta krea un laso emoshonal ku e mucha dor di kumpra kosnan di balor, duna sèn, i hasi diferente promesa na e mucha.

Sin duda, Kòrsou tambe konosé kasonan di pedofil. Tin hopi kasonan kaminda menernan di skol a abusá di vários mucha konstantemente, pa un término di tempu. Tambe di hendenan ku tin un posishon respetá den komunidat, i ku semper a traha ku mucha, ku despues di a wòrdu gará, a konstatá ku ta pedofil nan ta.

Un abusador seksual di momentu ta por ehèmpel kasonan den iglesia kaminda pastornan a abusá di kreyentenan dor di malusá e momentu i nan poder.

Tambe nos konosé kasonan kaminda un persona ku a disidí di sali su kas ku e intenshon pa probechá di e momentu òf su poder.

Un eksperensia asina akí tin efekto riba un mucha su bida ku ta krea trouma. Un di e mihó métodonan pa siña manehá e trouma akí ta den forma di terapia. Huntu ku un sikólogo e mucha ta siña diferente método pa usa na e momentu ku kisas e ta sintí su mes tristu òf deprimí.

Kòrda bon, si bo sa di un pedofil, abusador òf víktima, semper ta bon pa notifiká outoridatnan. Abuso ta i ta keda kondenábel i un mucha tambe tin su derechi!