WILLEMSTAD.-E insidente di siman pasá den sala di korte ta motibu pa kuminsá pensa riba mas seguridat den sala di korte. Siman pasá dos detenido, di un forma ku a sorprendé tur hende, a kue otro ku gòlpi den sala di korte. EXTRA a aserka Korte i tambe Ministerio Públiko pa tende si akaso a kuminsá pensa òf konsiderá medidanan adishonal pa evitá ripitishon òf asta n situashon mas serio. Fiskal mr. Guillano Schoop a informá EXTRA ku e infrastruktura den korte ta algu ku ta kompletamente e outoridat di korte. Ta korte komun ta disidí kiko òf kon. Naturalmente Ministerio Públiko lo por duna rekomendashon si.

Manera EXTRA a regata ku luho di detaye, e kaso tabata trata dos detenido ku huntu a kometé nan fechoria. Nan tur dos tin mesun abogado i asina e kaso a kana tambe ku e dos detenidonan aki. Tur kos a bai te na momentu ku un di e detenidonan a disidí ku dilanti di wes e ta kambia su deklarashon. Esei a pone ku e otro detenido no  gusta i a start un diskushon ku a finalisá den un pelea den sala di korte.

Den kombersashon ku fiskal Schoop el a duna di konosé ku si for di investigashon di e kaso por a sinti rivalidat òf kualke otro señal di enemistat entre e detenidonan OM lo a tuma medida i tene e detenidonan separá, pero no tabatin niun indikashon di mal kontentu entre nan dos. OM ta tene kuenta ku sirkunstansianan asina i for di tempran ta regla pa e transporte ta separá, pa nan sinta separá i pa ora di sinta warda den sala tambe ta pone LBD den estado di alerta etc. Ademas ta mèldu e personal di Landelijk Beveiligingsdienst(LBD) ku ta enkargá ku e seguridat den sala di korte.

Den e kaso aki nan no a premirá loke a sosodé. E fiskal ku a atendé e kaso a splika ku na momentu ku dilanti di mesa bèrdè un di e detenidonan a kambia e deklarashon ku el a duna anteriormente na polis e otro a rabia i ta e momentu ei a surgi e bringamentu. Segun fiskal Schoop, na momentu ku ta premirá kualke situashon mesora ta mèldu LBD i ta tuma tur klase di prekoushon.

Ku e insidente di siman pasá mester bai evaluá. Echo ta ku detenidonan ta yega korte ku nan pia di bui kaba, ademas kada bia ku wes ta hasi pregunta na un akusado e ta para dilanti di wes. Na otro paisnan tin un hòki será kaminda e detenido ta keda eiden te ora  mester bandoná e sala. Por konsiderá opshon pa pega e bui na pia na flur tambe pa e detenido no move, sinembargo si surgi kualke situashon ku ta bira nesesario pa move e detenido lihé pafó di e sala esei ta bira difísil si tin e bui di pia pega na flur tambe.

Fiskal Schoop a enfatisá ku e infrastruktura den korte ta outoridat di korte anto LBD ta esnan enkargá ku seguridat. E loke a sosodé sigur lo sirbi pa partidonan bai kuminsá pensa kon pa aktua si algu similar surgi atrobe.