WILLEMSTAD.- Na e skina di Gosieweg i Monreposweg tin un kasita ku tabata un trùk di pan ku awor a bira un kas pa abeha biba aden. E kasita aki pa basta tempu ta pará será pero su doñonan no a hasi nada pa mov’é di e sitio ei. Por mira kon yerbanan a kuminsá subié pero banda di yerba tambe insektonan i den e kaso aki abehanan a hasié nan bibá. I p’esei nos ke manda alerta pa públiko pa no pasa ei banda.

Ta tur dia tin hende ta keda piká pa abeha den e bisindario aki. Outoridatnan kompetensia ta na altura di e situashon pero tabata poko difísil pa por a kue tur e abehanan ainda. EXTRA a komprondé ku e abehanan ta hopi brabu i p’esei un apelashon na públiko, en partikular peatonnan ku ta kana den e bisindario aki pa keda poko leu.

Alabes un petishon na doño di e kasita pa tuma kontakto ku 917 pa por tuma medida pa por laga kita e kas di abeha aki for di e sitio. E ta un súplika òf mas bien un petishon urgente. Mester kit’é for di e sitio aki urgente pa evitá ku e abehanan sali i forma peliger aun mas grandi pa e peatonnan.