Despues di grandioso selebrashon kultural

WILLEMSTAD.- Kuaresma a kuminsá, despues di un tremendo temporada di karnaval 2019. Den e serenidat ku ta bini ku kuaresma hopi hende su mente ta focus bek riba asuntunan di sumo importansia, pero a baha hopi na intensidat manera ta sosodé ku kandela. EXTRA a tuma nota e situashon di Refineria Isla, kaminda e realidat ta ku no tin aktividat den e plantanan. Tin esnan ku ta hopi serka di e refineria ku ta splika ku nan no por a gosa trankil di karnaval, ku e pensamentu ku nan tin kiko por sosodé ku Refineria Isla.

E bista awe mainta riba chimeneanan di Isla pará ketu a bolbe lanta sentido di preokupashon serka hopi den komunidat. Karnaval tabata manera un remedi fuerte pa doló di kabes, pero una bes e remedi su efekto pasa bai i no a atendé ku e orígen di e problema e doló di kabes ta bini bek.

Ta un realidat ku refineria no tin krudo pa refiná i na otro banda frontera ku Venezuela ta kompletamente será. Riba e pregunta na e.o bosero di refineria Isla sr. Earl Balborda e ta konfirmá pa EXTRA ku e meskos ku hopi hende mas den e refineria no por a disfrutá ampliamente di karnaval miéntras ku nan ta pendiente di desaroyonan rondó di refineria. Por a sinti un tono di preokupashon basta serio sinembargo e bosero no ta duna splikashon pa esei.

Di parti Refineria di Kòrsou ta konosí ku a instalá un komité di 5 profeshonal lokal den e búskeda di un partner stratégiko pa e refineria. E tim aki ta guia e proseso pa yega na un partner stratégiko pa Refineria Isla di tal forma ku e proseso ta keda aselerá i ku ta trese mas transparensia den e proseso.  E komité ta enkabesá pa Evelyn Kruithof–Bor, Arthur Gevers, Patrick Newton, Alberto (Chos) Romero i Jessica Russel.Ta e intenshon pa mas pronto posibel por start negosiashonnan ku potensial partnernan adekuá pa e refineria. Gobièrnu di Kòrsou di forma hopi kla a indiká ku e prioridat ta pa tene refineria habri i salbaguardiá kuponan di trabou.