Update: Koninklijkbesluit no a yega ainda

WILLEMSTAD.-Informashon di último ora ku EXTRA ta dispone di dje ta indiká ku e ‘Koninklijksbesluit’ no a yega ainda. Esei lo ta e motibu pa kiko esnan konserní no a hana informashon ki dia i ki ora lo huramentá e persona ku ta bira e di 21 miembro. E ‘Koninklijksbesluit’ firmaa ta hasi e desishon di Konseho di Minister di Reino ofisial i ku tur peso di lei. Ku esei den man su ekselensia gobernador por tuma e pasonan nesesario pa asina e di 21 parlamentario por tuma asiento den e kolegio.

Pendiente e momentu huramentashon di e di 21 parlamentario

WILLEMSTAD.- No solamente Parlamento i gobièrnu pero tambe otro sektornan den e pais aki ta pendiente huramentashon di e sra. Emilou Capriles komo e di 21 miembro di Parlamento. Djabièrnè último Korsou a hana un instrukshon di gobièrnu di Korsou (aanwijzing) den kua ta duna su ekselensia gobernador di Korsou e outoridat verifiká i fiha e kredensialnan di e miembro nobo i pa despues e por huramentá.

EXTRA a puntra e miembronan di Parlamento sra. Giselle McWilliam i tambe Shaheen Elhage awe mainta i tur a bisa ku nan ta pendiente pa un ora pa otro haña notifikashon ku ta kla pa sra. Capriles huramentá. No tin muchu informashon riba e desaroyonan. Ta kalkulá ku su ekselensia gobernador lo hasi e trámitenan den su gabinete pa verifiká i fiha e kredensialnan pa despues invitá sra.Capriles na despacho di gobernador pa e por presta huramentu.

Manera ta konosí e situashon pa keda sin aseptá e di 21 miembro di Staten a kuminsá djaweps 11 di febrüari i despues di esei a yama diferente reunion den kua a trata na forma kuórem. A keda e posibilidat pa bai korte òf ku gobernador ta asumí su responsabilidat despues di papia ku lidernan di frakshon den kual esnan di oposishon a bisa bon kla ku nan lo no koperá bou di niun sirkunstansia.