WILLEMSTAD.- Informashon ku a kaba di drenta ta indiká ku sindikatonan ku ta representá trahadónan riba tereno di Refineria Isla a disidí na yama un reunion urgente pa papia riba e kaso ku mester kontinuá mayan djárason 18 di aprel den korte. Ta trata di e kaso ku organisashonnan ambiental a entamá kontra di e refineria debí na molèster di emishon den nos medio ambiente. Dirigentenan sindikal a yama tur shopsteward pa un reunion, ademas ta informá komunidat i nan miembronan via medionan di komunikashon kiko por spera di e kaso den korte di mayan.

E sindikatonan ku tin miembro riba tereno di Isla ta APRI, STK, SGTK i PWFC enkuentro unda ta bai duna informashon ta tuma lugá na sede di e sindikato PWFC. Manera indiká algun ano pasa e organisashon a kuminsá e kaso den korte despues ku pa hopi ano ta mustrando riba e nivel di emishon. Korte na e okashon ei a indiká ku mester instalá ekiponan sofistiká pa asina por midi  nivel di emishon. Di parti di refineria semper a mustra ku nan ta hasiendo esfuerso pa kontené e nivel di emishon na unu aseptabel. Mas importante ku tur kos ta ku refineria ta mustra ku nan ta kumpliendo ku e pèrmit di molèster ku nan a haña di gobièrnu.