WILLEMSTAD.- Promé minister Pisas a risibí e penshonadonan di Refineria Isla na entrada prinsipal di sede di gobernashon den Fòrti. Despues di skucha preokupashon di e grupo di penshonado sr. Pisas a atmití ku palabrashon ta palabrashon i ku mester buska un manera ku loke e grupo ta reklamando.

Sinembargo e mandatario a trese aklarashon riba sierto puntonan, e.o ku mester komprondé ku investigashon a demostrá ku no ta Refineria di Kòrsou (RdK) sino ta PDVSA debe e penshonadonan. Ya kaba PDVSA a atmití e debe aki. Mas aleu sr. Pisas a bisa ku anteriormente ora ku a paga e eks trahadónan esei por a sosodé pasobra e grupo ei a traspasá e debe di PDVSA na nan pa RdK. Esei ta nifiká ku PDVSA debe RdK e montante ei awor. Ademas a hasi esei pa evitá ku lo a pèrdè grupo grandi di e trahadónan miéntras ku gobièrnu i RdK ta hasiendo esfuersonan pa habri e refineria bèk.

Un otro aspekto importante ta ku RdK a manda pidi PDVSA kiko ta e montante korekto di e debe. Echo ta ku tin negosiashon kanando i tin un kaso den korte. Korte a pidi PDVSA i RdK pa sinta na mesa pa buska un solushon. E kaso ta basta leu. E punto ta ku den RdK tambe no tin bon bista kuantu sèn presis ni kuantu hende debe.

E penshonadonan mesora a splika sr. Pisas ku mester buska un sr. Beaujon, Suiters òf Goeloe pasobra nan si tin tur informashon di kuantu sèn i kuantu hende PDVSA debe den e kaso aki. Sr. Pisas a pidi e penshonadonan pa reuní ku nan otro siman.

Último paso promé ku nan bai korte

WILLEMSTAD.-Un grupo di penshonado a bai sentro di gobernashon na Fòrti pa einan entrega un karta na promé minister Pisas. E penshonadonan di Refineria Isla ta denunsia trato inhustu di parti di gobièrnu i Refineria di Kòrsou (RdK) pasobra PDVSA a laga debe atras serka eks trahadónan, penshonadonan i wérfanonan pero gobièrnu i RdK a regla pago pa solamente e eks trahadónan i a laga penshonadonan afó.

E kos ei ta trato inhustu, segun sr. Pietersz ku a hasi deklarashon na nòmber d e grupo di penshonadonan. E grupo di penshonado a kana na un forma masha trankil i yega na porta di Fòrti i a hasi petishon pa entrega e karta na promé minister.

E grupo ta konsiderando pa bai korte, pero promé ku yega einan a disidí ku ta duna gobièrnu un chèns mas pa wak kiko por regla. E kos aki ta durando demasiado kaba, ta 54 luna penshonadonan di Isla ta den e situashon aki.