WILLEMSTAD.- E Unidat Organisashon Penshonado bou di fondo di penshun APC lo manda un karta di rekordatorio pa gobièrnu di Kòrsou pa kumpli ku palabrashon pa reuní riba puntonan. For di 20 febrüari ta pendiente kontinuashon di un reunion pa kaba di atendé algun punto di importansia pa  penshonadonan manera pago di “duurtetoeslag” pa penshonadonan ku tabata traha pa un kompania anónimo di gobièrnu.

Promé minister Gilmar ‘Pik’ Pisas a kanselá e reunion planiá dia 23 aprel ku e organisashonnan di penshonado UPAH, APKK, MPP, APT i ABVO pasobra no a haña tur informashon ainda serka direktor di kompanianan anónimo di gobièrnu relashoná ku “duurtetoeslag” i indeksashon di penshun di penshonadonan ku tabata traha pa e kompanianan aki. E direktornan a indiká ku nan mester di mas tempu pa buska tur informashon.

Den e último reunion di 20 febrüari Pisas a invitá direktor di tur kompania di gobièrnu i representantenan di fondo di penshun APC pa nan ta presente. A hiba un diskushon riba e pago di ‘duurtetoeslag’ i indeksashon di penshun i basta punto aklaratorio a subi mesa.

APC ta paga penshun pero ta e último doño di trabou ta paga e “duurtetoeslag”. Aki tin diskushon entre e kompanianan i APC. E fondo di penshun no ta paga e “duurtetoeslag” si e no risibí e sèn di e doñonan di trabou.

E organisashonnan di penshonado ta di opinion ku no por t’asina ku e penshonadonan no ta kobra nan sèn kompletu. Ta den e kuadro aki Pisas a pidi tur kompania di gobièrnu pa pone pretu riba blanku kiko segun nan a paga kaba na “duurtetoeslag”.

A palabrá ku lo manda esaki pa minister di Finansa, Javier Silvania pa asina kontrolá esaki ku loke APC tin registrá di a risibí na pago. Sinembargo pa fin di aprel ainda e kompanianan no a entregá tur informashon i riba petishon di Pisas a posponé e reunion ku ainda no tin fin di tuma lugá.

E organisashonnan di penshonadonan mester a reuní e siman aki riba e situashon aki, pero e reunion no a sigui mas pa diferente motibu. Martina ta bisa ku a palabrá ku ta reuní otro siman pa disidí si ta manda un karta di rekordatorio pa gobièrnu pa yama e reunion pa kaba di atendé e asuntu di “duurtetoeslag” aki.

“E kontakto ku e aktual gobièrnu a inisiá bon, pero último tempu e kosnan no ta kanando na satisfakshon”, esta Martina. Otro aspekto ku penshonadonan ta pendiente di dje ta pa saka for di pakete di pais e intenshon pa kòrta ku 10 porshento den “duurtetoeslag” di tur penshonado di APC.

Apesar di promesa di Pisas ku e lo a hasi esaki, den e pakete di pais ku Pisas i èks sekretario di estado, Alexandra van Huffelen a firma na final di mart último e intenshon pa kòrta 10 porshento den “duurtetoeslag” ainda ta inkluí.

Martina ta bisa ku ta trata di un promesa ku Pisas no a kumpli kuné i ku ke atendé e punto aki kuné.