Mantené derechinan penshonado!

WILLEMSTAD.- Penshonadonan den un konferensia di prensa un ratu pasá a mustra nan preokupashon pa e intenshon di gobièrnu pa kòrta drástikamente den tur loke ta trata benefisionan na penshonadonan. Manera EXTRA a informá den último dianan tin den e "Landspakket Curaçao" un pakete formulá pa baha ‘duurtetoeslag’ ku 10%. Mester konkretisá esaki pa 31 di mart 2021. Asosiashon UPAH, Asosiashon Penshonadonan Polisial Kòrsou APPK, Asosiashon Penshonadonan Uni APU

Asosiashon Penshonado Telekomunikashon APT i Komishon Penshonado  di ABVO, den konferensia di prensa a splika e loke ta biba bou di penshonadonan di APC.Nan a dediká atenshon tambe na e proposishon di SVB pa baha penshun di behes i eliminá e bónus di fin di aña.

E penshonadonan a splika ku e entrada di penshun di un penshonado ta solamente 70% di su último salario.

E entrada di penshun ta konsistí di e penshun di fondo di penshun APC i e ‘duurtetoeslag’. Manera nan mes a splika, e penshun di APC no ta sufisiente pa kubri tur e gastunan di e penshonado i p’esei tin e ‘duurtetoeslag’ pa kompensá pa yega e 70%. Ku otro palabra si mishi ku e ‘duuurtetoeslag’ e 70% ta bira ménos.

Ademas debí na inflashon e entrada di e penshonado ta bira ménos. Komo ku no a indeksá e penshun, e penshun ta bira tur aña ménos. Konsekuensia di esei ta, un ámtenar ku penshun kada bia por kumpra ménos. E ámtenar ku penshun ta bira mas pober di forma struktural.

Pa e motibunan ei ámtenarnan ku penshon ta pidi pa mantenshon di nan derechonan riba alimentashon, salubridat i tambe nan ta pidi pa e derechonan ei keda apliká sin deskriminashon.

Mas aleu e penshonadonan a bisa ku no solamente gobièrnu ke kita 10% di ‘duurtetoeslag’, pero awor SVB ke pa redusí AOV tambe. E historia di AOV ta pa frena pobresa bou di penshonadonan.

Esnan ku ta kobra solamente AOV di baina por biba kuné,. Si redusí esaki ku 10% ta kiko ta sobra?

E intenshon di e gobièrnu aki ta pa baha pobresa i duna hende chèns pa biba, pero ta kon nan ke logra esei tumando desishonnan nèt kontrali? File foto