WILLEMSTAD. - E hòmber T.P. (32) a keda kondená na un kastigu di 16 luna di kual 9 kondishonal durante kasonan di mula. E akusado aki no a presentá i e kaso a keda trata verstèk.
E ta keda akusá di kier a transportá un kantidat di 607 gram di koka, den forma di pasta.
Segun e prosèsverbal e akusado a yega Hato ku e intenshon pa biaha pa Hulanda.
Durante kontròl e personal di duana a ripará ku e akusado ta aktua basta nèrvioso. Ora a listra su ekipahe di man a haña un bòm falsu ku tabatin un saku di plèstik ku koka na pasta.
E akusado a atmití su kulpa na polis i a bisa ku e kier a transportá e droga pa e haña sèn pa e por paga hür kuminda i kosnan di skol pa su yunan. E tabata traha i tabata pendiente pa su pago, pero a pèrdè su trabou.
Banda di esaki e tin un yu ku a kaba di nase i e mester sòru pe.
Esaki a pone ku el a kai den desesperashon i a bai di akuerdo pa transportá droga.
El a bai serka un konosí ku a regla un hende pa e pasamentu droga.
Fiskal a haña e akusashon probá i a tene kuenta ku e ta “first offender” i ku e droga tabata na pasta i 20 porshento ta wòrdu kita afó.
Mirando esakinan fiskal a demandá e akusado na 16 luna di kual 9 kondishonal ku un periodo di prueba di 3 aña.
Hues den su desishon no a mira motibu pa desviá i a bai di akuerdo ku e demanda di fiskal.