WILLEMSTAD.- Durante tratamentu di kasonan di infrakshon di tráfiko, basta persona a splika hues ku nan no por paga but, pa motibu ku nan a pèrdè trabou entre otro durante e pandemia di COVID.
Esaki sigur a hala basta atenshon den sala di korte.
Entre nan un dama shofùr ku a keda akusá di tabata kore su vehíkulo sin karchi di kùr válido i tambe sin seguro.
El a atmití ku e no tabatin su seguro na momento ku polis a par’é, pero despues a logra bai pag’é.
Hues a duna di konos’é, ku polis a skibi den prosèsverbal ku e dama a bisa di ta hasi uso di su drechi keda ketu.
E dama a splika ku el a hasi esaki pa motibu ku e no kier a bai den diskushon ku e agente.
El a sigui duna di konos’é na korte ku aktualmente e no ta disponé di un trabou i p’esei no por a regla su kosnan na tempu, manera mester ta. Durante pandemia aña pasá el a pèrdè su empleo i te ainda no a haña un trabou.
Segun e dama e mes tin ku atendé ku su yunan i hiba nan skol, p’esei e tabata kore e vehíkulo sin ku e dokumentonan tabata reglá.
Hues a duna di konos’é ku no muchu tempu pasá e akusado a haña un but kaba dor di a kometé mesun tipo di infrakshonnan.
E dama na su turno a splika ku su situashon no ta fásil i ku e tin e basta difísil.
El a bisa tambe ku mientrastantu el a haña yudansa di algun familiar ku a yud’é pa drecha su papelnan i por kore su vehíkulo legalmente.
Fiskal a pasa man na su kurason i a hasi un demanda di 150 florin pe akusado den término di 2 luna.
E dama a bisa e lo hasi su máksimo pa paga e butnan, pa motibu ku e no tin un entrada.
Hues den su desishon a haña e demanda rasonabel i a bai di akuerdo ku e demanda di fiskal.