WILLEMSTAD.-Un periodista ayera a lamentá di tabata den sala di korte, pa korementu di outo fuma.
Segun e akusashon dia 26 di febrüari último el a pasa dor di un kontròl di tráfiko, kaminda polisnan tabata kontrolá tur shofùr pa wak si nan ta kore outo bou di influensia di alkohòl.
Entre nan e periodista en kuestion ku mester a supla den e aparato pa midi e kantidat di mikrogram, ku e tabatin den su sistema.
A resultá ku e mashin a midi 1200 mikrogram. E shofùr a deklará na polis ku el a bebe mas o ménos 8 bòter di serbes.
Fiskal a bisa mirando e kantidat di mikrogram ku e tabatin den su sistema ta kalkulá ku el a bebe entre 14 pa 16 bòter di serbes.
El a splika ku e anochi ei algun amigu a invit’é pa bai Mambo ku nan.
Den promé instante e no kier a bai, pero despues a disidí ku e ta bai tòg. Einan el a hañ’é den e ambiente i a bebe algun serbes.
Fiskal den su rekisitorio a splika e akusado kon peligroso ta kore outo bou di influensia di alkohòl i tambe e konsekuensia.
Fiskal a yega na un demanda di 1700 florin di but mas un kastigu di 161 dia di kual 120 kondishonal ku un periodo di prueba di 3 aña.
Hues den su desishon a bai kompletamente di akuerdo ku e demanda di fiskal.