WILLEMSTAD.- Ayera alrededor di algu pa tres di mardugá, Sentral di Polis a risibí informashon di un kaso di ladronisia ku violensia ku tabata tumando lugá na un kas na Mon Reposweg.

Unidat di Rio Canario ku a yega na e sitio, a topa dos hòmber ku tabata bringando ku otro.

Un di e hòmbernan ta kolega periodista Yves Cooper ku tabatin un herida serio na altura di su wowo i tabata sangra bastante.

Polis a para e bringamentu inmediatamente i a kuminsá ku un investigashon.

Segun Yves Cooper a indiká, e la kaba di yega kas i a keda sorprendé pa e sospechoso ku nèt e momentu ei a kaba di kibra den su vehíkulo ku tabata para den kurá di kas.

Na momentu ku e víktima a bai atendé e sospechoso, e último aki lo a dal e víktima ku un opheto fuerte, na su kabes i herid’é ku intenshon di hui for di e sitio pero sin e resultado deseá.

O.G.M. a keda detené na e sitio pa ladronisia ku violensia i a wòrdu presentá dilanti di un fiskal ouksiliar ku a ordená su enkarselamentu pendiente di mas investigashon.