WILLEMSTAD – Minister di Desaroyo Sosial, Labor & Bienestar, Minister Hensely Koeiman, a tuma un desishon dia 16 di aprel 2021 na benefisio di dunadónan di trabou ku pèrmit di trabou. El a hasi esaki tambe pa tur aktor por tin e espasio nesesario pa atendé ku e aspekto atministrativo di pèrmitnan ku lo kaduká den e temporada difísil ku Kòrsou ta aden.

Minister a tuma e desishon aki konsiderando e impakto ku e medidanan tumá pa kontrarestá plamamentu di  COVID-19 tin riba diverso sektor di nos ekonomia, kupo di trabou i tambe e aspekto operashonal di Sektor di Labor di Ministerio di Desaroyo Sosial, Labor i Bienestar (SOAW).

Pa brinda e negoshi, e ekstranhero i Sektor di Labor e espasio pa atendé ku pèrmit, Minister Koeiman a disidí ku si un pèrmit di trabou ta kaduká entre 24 di mart i 31 di yüli 2021, konforme e desishon nobo (MINIS-BESCHIKKING-SOAW) di gobièrnu, e pèrmit ta keda bálido te 31 di yüli 2021.

E desishon aki, e ekstenshon di balides di pèrmit di trabou, no ta konta pa dunadó di trabou ku no a entregá un petishon pa ekstenshon di pèrmit di trabou promé ku anunsio di e lockdown aktual.