WILLEMSTAD.- Ayera nochi den kareda 9 or pasá tabatin un aksidente entre un outo di polis i un outo di famia. A resultá ku ta un persekushon a terminá den e aksidente aki.

Segun EXTRA por a komprondé, for di den Marchena polis a nota un outo koló skur, kaminda e shofùr lo a aktua sospechoso i nan a duna òrdu pa para. En bes di e para el a purba kore bai laga polis.

A kuminsá ku un persekushon kaminda diferente otro unidat polisial a bin asistí. Na altura di e lusnan di tráfiko na e krusada di Aqualectra na Mundu Nobo, polis a pega den e outo di e sospechoso. Esaki a pone ku a yega un fin na e persekushon.

A detené e hóben shofùr, ku parse tabata manehando outo di su mama. A bai kuné warda di polis na Otrobanda miéntras polisnan a bai e trayekto kaminda e outo a kore pa mira si por haña algu ku nan a mira e sospechoso lo a benta fo’i bentana.

Te ku lat tabata buska i no ta konosí pa EXTRA ku a logra haña algu.