WILLEMSTAD.- Ora nos tende desabilidat nos tin e tendensia di enfoká riba loke un persona no por, kaminda e hende por tin diferente otro abilidat ku ta un balor agregá pa nos komunidat. P’esei e Feria di Abilidat di djadumingu awor na ‘Entrepreneur Zone’ den Sambil di 2 or mèrdia pa 9 or anochi, lo bira e sitio históriko pa eksperensiá i konektá ku tur e diferente personanan ku un desabilidat ku lo bai mustra nan abilidat.

Djadumingu awor ta dia Internashonal pa Personanan ku un Desabilidat. Na Kòrsou lo dediká atenshon na esaki selebrando abilidatnan di personanan ku un desabilidat. Lo bai tin bendementu di kos dushi, stulnan trahá di palèt, dekorashonnan di pasku, masashi i hopi mas. Tur esakinan ta kosnan ku personanan ku un desabilidat ta traha nan mes. Banda di personanan individual ku ta bin mustra nan abilidat tin 12 mesa di informashon di fundashonnan. E fundashonnan aki ta varia den diferente grupo di enfoke pa asina mas tantu desabilidat keda representá riba e dia ei. Ta bai tin Autism Aid Foundation, Downsyndroom Awareness Curaçao, Fundashon Pro Bista, Asosashon di mayor Totolika, De SGR-Groep, Fundashon Kontakto, Fundashon Alton Paas, Funditut, Stichting MS, Special Olympics Curaçao, Soeur Hedwigschool i Fundashon Hèndikèp Ouditivo. Ku e diferente fundashonnan aki por haña un variashon di informashon tambe tokante diferente desabilidat i alabes konsientisá tokante e grupo aki di nos komunidat, paso nos no por mira futuro pa sa ken mas lo ta parti di e komunidat aki.

Komo parti di e selebrashon mester tin un show ku músika i entretenimiento. P’esei 2 or lo kuminsá ku e apertura kaminda lo tin algun diskurso di Minister di Asuntunan Sosial, Bienestar i di Labor i tambe di un persona ku un desabilidat. Parti di e apertura lo tin tambe lansamentu di un videoclip nobo di Aemy Nia Feliz pa e kantika  di dje titulá Selebrá Abilidat. Despues lo tin show di moda di Akisha i su grupo i tambe lo sigui ku entretenimiento di dj Jörgel, Kor Sta Maria ku algun kansion di fin di aña di kual un solista lo ta un hóben den ròlstul. Lo tin tambe dj nan  Fraishel Kleinmoedig, Nelson Reina i presentashon di e prestigioso Blindmen Band.