WILLEMSTAD.- Formadó Chester Peterson djabièrnè último a bai Palasio di Gobernador pa informá sra. Lucille George-Wout kon e trayekto di formashon pa un gobièrnu nobo ta kanando. Segun Peterson e trayekto ta kanando bon. Te ainda proseso di screening ta andando. Peterson mes ta di opinion ku e lei di screening no ta korekto. E abogado ta menshoná ku tin basta hende den komunidat ku no ta di akuerdo ku proseso di screening, tambe tin un proposishon pa un lei di screening nobo. I den akuerdo di gobernashon di MFK i PNP ta skirbi ku gobièrnu nobo tin intenshon, tumando na kuenta loke artíkulo 30 di nos Areglo di Estado ta dikta, pa adaptá e lei di ‘screening’ pa (kandidaat) minister. I pa re- implementá reglanan ku ta eksihí ku (kandidaat-) minister mester duna akseso den nan posishon finansiero promé, ku durante i despues pa un periodo di 2 aña ku nan a asumí nan posishon. Ora ta traha riba esaki lo por rekomendá esaki pa Staten tambe.
‘Tambe mester tene kuenta ora ta ‘screen’ un kandidaat-minister ku e persona aki ta inosente te ora ku un hues konden’é. Mas mester tuma na konsiderashon tambe ku nos Areglo di Estado no ta apuntá ningun otro lei pa regla mas aleu pa loke ta trata e eksigensianan pa kumpli pa keda nombrá. Tur esaki ta konfirmá den e rapòrt na final di e dokumentu aki di ‘Raad voor de Rechtshandhaving’.’
Peterson: ‘Si bo ta wak Areglo di Estado, e ta bisa presis ki kualifikashon bo mester pa bo por tin un minister. Bo mester ta hulandes, bo mester biba na Kòrsou i bo no mester di ekskluí pa derechi di voto. Si bo ta traha un lei ku tin mas eksigensia bo ta a-konstitushonal.’ Peterson tambe ta bisa ku lei di screening tambe tin algun aspekto ku ta kontra leinan internashonal i kontra leinan di derecho humano. ‘E lei di screening no ta bon. E no ta pas den un estado demokrátiko.’ Den e lei ta skirbi tambe ku mester tin un mayoria di dos tersera parti pa kambia e lei. Pero segun Peterson esaki ta un ‘payasada’.
‘Parlamento di 21 hende no por bisa ku nos ta traha un lei ku bo por kambia solamente ku 14 hende. Esaki no por. Nos Areglo di estado ta bisa ku ‘lei ta lei’. Ku ta nifiká ku bo por skirbi ku bo mester tin dos tersera parti pa kambia esaki, pero esaki no ta konta. Hoge Raad den pasado a konfirmá esaki kaba.’
Peterson a splika ku e ta no diskutí esaki ku gobernador mes. ‘E no ta un persona polítiko, mi no ta papia kos polítiko kuné. Mi no ta papia tokante lei di screening ku gobernador, pero ku Pisas si.’ Relashoná ku proseso di formashon Peterson ta bisa ku e kambio ku a tuma lugá algun aña pasá na Hulanda pa duna parlamento mas poder i minimalisá ròl di Rei den e proseso di formashon ‘ta algu korekto’. Peterson: ‘Formashon ta un proseso polítiko, polítikonan tin ku mete ku esei. I no persona no polítiko.’