Mester konsiderá hinter e elekshon inbálido

WILLEMSTAD.- Despues ku Konseho Elektoral a presentá sifranan ofisial di elekshon un grupo di hende a trese opheshon i a eksigí pa inkorporá e opheshonnan den e ‘prosèsverbal’. E promé tabata abogado Achim Henriquez, sigui pa Susanne Camelia-Romer i a sigui mas opheshon di Marelva Jansen di Partido Nashonal, Miles Mercera di Vishon, Chehady Eddine di partido Democraat tambe a entrega opheshon. A posponé e reunion i komo tal no a fiha e sifranan di elekshon.

Abogado Henriquez a representá Raichel Sint Jacoba, otro kandidatonan riba e lista Un Kambio pa Kòrsou i el a presentá komo siudadano. Henriquez a kuminsá bisa ku tabatin kambio di e areglo di elekshon fin di aña pasa i a base di esaki mester tin un LbHam pa fiha e biyete di elekshon, pero e lbHam aki no ta eksistí, asina e abogado a reklamá. E abogado ta bisa ku mester konsiderá tur biyete di votashon komo inbálido. Pa loke ta trata e diskushon riba biyetenan pretu ku blanku i kolo e ta bisa ku definitivamente tabatin biyete pretu ku blanku i e echo ku Konseho Elektoral ta bisa ku no a haña niun ta motibu pa oumentá e duda. Achim Henriquez ta eksigí rekonteo di votonan. Tur biyete di elekshon mester ta meskos sino mester konsiderá hinter e elekshon inbálido.

E asuntu ku a pasa votonan di defuntu Almier Godett pa e number unu riba e lista di Trabou pa Kòrsou no ta basa riba niun lei asina Henriques a sigui bisa. Despues e lider di partido PIN Susanne Camelia-Romer tambe a entregá mas opheshon i a pidi rekonteo di votonan pa klarifiká vários punto manera e eksistensia di biyetenan blanku ku pretu mei mei di esnan di kolo. Mas detaye den edishon di EXTRA.