Djabièrnè 4 di òktober 2019 alrededor di 08.25 or, e hòmber sospechoso S.T.E.P. di 29 aña di edat nase na Kòrsou, kende tabata bisto riba e video ku polis a publiká dia 3 di òktober último (Komunikado di Prensa 395/2019), a entregá su mes na departamentu di Tim di Atrako.
Ta trata aki di e kaso ku a tuma lugá dia 25 di ougùstùs 2019, unda un hòmber i un dama a sekuestrá un damita.
Algu despues, alrededor di 09.40 or e otro sospechoso, e dama A.E.M. di 33 aña di edat nase na Kòrsou, ku tabata den kompania di e hòmber ariba menshoná, tambe a entregá su mes na e departamentu konserní.
Ámbos sospechoso a keda detené i presentá dilanti un Fiskal Ouksiliar ku a ordená nan enkarselamentu pendiente di mas investigashon.
Kuerpo Polisial ke yama danki na tur medio di komunikashon ku a koperá pa publiká e imágennan ku a keda suministrá, ku a enkurashá e dos (2) sospechosonan pa entregá nan mes.

Fugitivo:

WILLEMSTAD.- Dia 2 di sèptèmber EXTRA a publiká un informashon di kual nos so tabata disponé di dje relashoná ku un kaso tristu ku a tuma lugá ku un mucha muhé oropeo stazjèr.

Dia EXTRA a publiká e informashon aki, hopi ta esnan ku a kritiká e informashon indikando ku lo tabata trata di un “Fake News”.

Awor Kuerpo Polisial di Kòrsou mes a konfirmá e informashon i den mesun rosea pidiendo yudansa na komunidat.

Kuerpo Polisial di Kòrsou ta pidiendo yudansa na komunidat pa yuda solushoná e kaso basta lamentabel ku a tuma lugá algu ménos ku dos luna pasá.

25 di ougùstùs último alrededor di mitar di dos di mardugá un hobensita a wòrdu sekuestrá riba Caracasbaaiweg na altura di un trùk di pan.

E malechornan (un persona di sekso maskulino i unu femenino) a mara e damsita aki na su man i pia, tapa su wowonan, i bai ku e damsita aki kontra su boluntat na dos diferente bankomátiko, i a oblig’é saka sèn for di tur dos bankomátiko.

Unu den e bario di Jandoret i unu den bario di Buena Vista.

E malechornan a trata na diferente okashon di choke i despues ku nan a logra saka sèn for di e bankomátikonan nan a bent’é, mará na su man ku pia, for di baranka na e mirador mei mei di Kenepa chikí ku Kenepa grandi.

Polis ta hasi un súplika na kualke persona ku por rekonosé e persona riba e grabashon aki òf ku tin informashon tokante di e kaso aki, pa por fabor mèldu esaki na polis via di e numbernan 917 òf 108, kual ta e liña anónimo.

Un biaha mas EXTRA a sa di demostrá ku semper bai su notisianan ta i lo keda konfiabel.