WILLEMSTAD.- Ministerio Públiko (OM) den un informe ofisial ta duna di konosé ku Prokuradó General a seponé e kaso ku parlamentarionan Gerrit Schotte i Charles Cooper ámbos di MFK a entamá kontra Yael Plet di MAN. Schotte i Cooper ta akusá Plet di difamashon i intenshonalmente daña nan honor i reputashon.
OM ta splika ku ta trata aki di kontinuashon di e investigashon yamá ‘Wilhelmina’ ku a keda ehekutá pa Landsrecherche Curaçao bou di mando di OM. Ministerio Públiko a husga e denunsiánan di miembronan di Parlamento Schotte i Cooper kontra miembro di Parlamento Plet. A investigá e pregunta si e denunsia di Plet di dia 18 di febrüari 2017 pa intento di soborno tabata falsu i si Plet ku e denunsia kontra Schotte i Cooper a kometé difamashon (smaad en laster).
Ministerio Públiko a yega na e konklushon ku no por determiná ku e denunsia tabata falsu, pa motibu ku riba vários parti e investigashon a haña sosten di entre otro imágen di kámara, datonan históriko di telefòn, mensahenan riba telefòn i deklarashonnan di testigu. Den mas ku un deklarashon ta ser konfirmá ku Plet a keda aserká pa mira si e tabata dispuesto pa hala bek su sosten na gobièrnu Koeiman òf pa ‘bula waya’ pa un otro partido. Solamente pa e punto di ofresé plaka no tin sufisiente prueba. Pa difamashon, pa intenshonalmente daña e honor i reputashon, tambe tin insufisiente prueba.
Ministerio Públiko ta konkluí for di e investigashon ku Plet su intenshon ku su denunsia tabata tin komo meta pa laga start un investigashon dor di polis i hustisia relashoná ku un posibel echo serio, i no pa intenshonalmente daña nòmber i honor di Schotte i Cooper. Soborno di polítiko ta, dado kaso e ta keda probá, un echo serio. Formanan di korupshon asina ta forma un menasa serio pa estado di derechi. P’esei ta den interes general di Kòrsou ku akusashonnan asina ta keda investigá a fondo dor di instansianan outorisá. Prokuradó general a disidí awe, 24 di mei 2018, pa seponé e kaso aki. Esnan envolví i nan abogado a ser pone na altura di e desishon aki.