WILLEMSTAD.- Ta for di aña pasá Prokurador General (PG) ta bon na altura kua kandidato no a kumpli ku e lei di finansiamentu di kandidatonan pa elekshon.

Resientemente Konseho Supremo Elektoral (KSE) a kontestá parlamentario di partido KEM riba su preguntanan lansá tokante kandidatonan ku a bai elekshon último, dia 19 di mart 2021, ku no a entregá nan relato finansiero ainda. Banda di esaki KEM ta sorprendé ku KSE ta duna nan oportunidat te ku fin di luna di ougùstùs pa hasi esaki. Sinembargo luna di ougùstùs 2021 a terminá i nada a sosodé.

Despues di a pidi pa kontesta di parti KSE riba su preguntanan, e frakshon di KEM den persona di Michelangelo Martines a haña kontesta komienso di e luna aki.

Segun KSE a splika ku konforme artíkulo 12 insiso 2 di e lei di finansa di agrupashonnan polítiko tur persona ku a partisipá komo kandidato riba un lista na elekshon di 19 mart 2021 mester a entregá pa fecha 19 aprel 2021 na KSE kopia di un registrashon di donashon risibí kompañá di un deklarashon di firma.

Pa 13 desèmber 2021, 72 di e 353 personanan ku a partisipá komo kandidato na elekshon di mart 2021 no a entregá nan deklarashon.

Entre aprel i ougùstùs 2021, KSE aktivamente a keda “follow-up” serka e personanan di kontakto di e agrupashonnan polítiko pa logra ku tur kandidato lo a entregá nan deklarashon.

Na fin di ougùstùs 2021, KSE a manda un rekordatorio personal pa kada un di e kandidatonan ku e na e momentu ei no a kumpli ku loke tin stipulá den artíkulo 12 insiso 2 di e lei di finansa di agrupashonnan polítiko.

Riba 23 di sèptèmber 2021 KSE a pone Prokurador General na altura ta kua ta e 86 kandidatonan ku ta den violashon di e lei.

Konforme artíkulo 21 di e lei di finansa di agrupashonnan polítiko, esun ku a violá artíkulo 12 di e lei aki por risibí un kastigu di maksimalmente 3 luna di prisòn òf un but di maksimalmente 10 mil florin òf un kombinashon di tur dos.