WILLEMSTAD.- Kòrsou a registrá su promé morto den tráfiko pa aña 2019 despues ku un motosiklista a keda alkansá pa un pikòp ku a dal e i bai lag’é na e sitio.
Tabata den oranan lat di anochi ku polis a risibí informashon di un aksidente serio ku a tuma lugá riba Andres Belloweg krusada ku Pater Poeiszstraat.
Na nan yega da na e sitio a pidi ambulans pa asina atendé ku e motosiklista ku a resultá seriamente heridá.

Na momentu ku e promé ambulans a yega a pidi presensia di un di dos ambulans pa asina yuda ku reanimashon, miéntras ku a kuminsá ku trámitenan pa transportá e motosiklista ku urgensia pa departamento di emergensia pa tratamentu médiko avansá.
No a dura muchu ku algun ratu despues a drenta e informashon ku e motosiklista a fayesé debí na múltiple leshonnan ku el a risibí.
Segun testigunan na e sitio, un pikòp koló pretu lo a pasa riba un velosidat hopi haltu pa despues dal e motosiklista.
For di un distansia shofùr di e pikòp a baha wak e víktima bentá riba kaya, pa despues drenta su pikòp bèk i ku lusnan pagá a bandoná e área.
No a dura muchu ku algun ratu despues polisnan a topa ku e shofùr i e pikòp den e área mes. Polisnan a bai kuné bèk na e sitio di e aksidente.
Awe den transkurso di dia, polis lo duna identidat di e víktima despues ku kaba di pone tur famia na altura.

Motosiklista identifika;

E hoben motosiklista envolvi den e aksidente ayera nochi a keda identifika komo Shursy Leonel Shurnel Elias, nasé na Hulanda dia 14 febrüari 1991. EXTRA ta ekstende kondolensia na famianan i Pas na su restunan.