Despues di a konstatá algu di atenshon; Pasaheronan a pasa sustu

WILLEMSTAD.- Pasaheronan di buelo 3R023 a hiba sustu di nan bida djabièrnè atardi na momentu ku un di e motornan di e Avion aki a paga den laira. Esaki tabata un buelo di e kompania Dividivi ku mester a sali di Boneiru pa Kòrsou alrededor di 4.15 di atardi. E Avion ta e modèlnan ku ta karga solamente 7 persona pues 6 pasahero i e piloto.

Algun persona na bordo di e avion a konta EXTRA ku for di momentu ku esaki tabata bai subi nan a sinti algu straño. Por a sinti si ku e Avion a subi ku un tiki komplikashon. Despues di mas o ménos 8 minüt den laira e motor na man robes a paga.

E piloto a trata na vários okashon pa sende esaki pero sin e resultado. E Avion a kuminsá zueif, segun e pasaheronan por a sinti I pèrdè balansá, e piloto a hasi su máksimo esfuerso pa kontrolá e situashon I a logra bira bek direkshon Boneiru.

Loke e pasaheronan ta haña remarkabel ta ku durante di e situashon aki nan no a keda informá kiko tabata pasando.

E avion a logra yega Boneiru sano i salvo ounke ku un grupo di pasahero ku a pasa sustu. Personal di airopuerto a guia e pasaheronan i hiba nan sala di espera. Aki un persona di e kompania Divi Divi a aserka nan I a indiká ku awor mester wak kon pa repartí nan den e diferente buelonan paso no tin lugá pa tur hende bai Kòrsou huntu riba e siguiente buelonan.

E pasaheronan ta lamentá ku na ningun momentu miembro di staf òf personal a pidi nan diskulpa pa loke ku a sosodé ni tampoko a chèk si tin personanan ku ta tin mester di ayudo emoshonal òf di dòkter.

Algun pasahero a hasi petishon pa por haña algu di bebe pa baha sustu i esaki lo a keda ninga.

Tambe ta tin pasahero ku a indiká ku debí na e sustu nan lo no por bolbe subi un Avion e mesun dia ei mirando loke ku a kaba di sosodé, nan a haña komo kontesta ku nan lo pèrdè nan ticket e ora ei.

EXTRA a komprondé ku aki nan a surgi un interkambio di palabra entre pasaheronan i Personal di Divi Divi i na final e personanan a risibí nan sèn bèk. I na momentu ku e personanan a sali for di aeropuerto ainda mester a warda 2 ora pa por a risibí nan maletanan.

Informe di Divi Divi Air

Divi  Divi mes a saka un komunikado algun ratu pasa konfirmando problema ku e avion. Segun e komunikado di Divi Divi, miembro di tripulashon a konstatá algu di atenshon i a tuma e medidanan di seguridat segun protokòl i prosedura pa paga un di e motornan komo medida di prekoushon. I segun prosedura e avion a bai e airopuerto di mas serka i a baha sano i salvo na Boneiru.

Divi Divi ta informá ku tur pasahero a baha sano i salvo i no tabatin hende ku a keda herida. Tur pasahero a keda akomodá riba otro buelonan pa nan por a yega nan destinashon e mesun dia.

E avion mes ta den inspekshon pa e ekipo di mantenementu pa determiná e kousa di e indikashon.

Divi Divi Air ta pidi diskulpa pa kualke inkombeniensia ku esaki a okashoná i ta gradesí e pasaheronan pa nan komprondementu i kooperashon.