“Pincho” 40 aña den tambú

Lokal

Na sèptèmber 1977 Sherwin “Pincho” Anita a lanta su propio grupo di tambú. El a lanta for di chikí manera bieunan lo a bisa, den saya di tambú. El a krese kuné i e aña aki e ta kumpli 40 aña ofisialmente kantando tambú. I Kas di Kultura ta dediká e temporada di tambú aki, ku ta kuminsá ofisialmente awe djasabra, na Sherwin Anita alias Pincho. I nos tur por mira i tende Pincho awe nochi den e paranda di Tambú 2017 na Hòfi Bill di 6’or di atardi te 12’or di anochi. Entrada ta grátis. Laga nos tur bai pa apoyá tambú i duna rekonosementu na e gran Pincho.

Un hòmber masha simpel, ku ta karpinté di profeshon pero komo trabou e ta traha ku adiktonan pa Fundashon Maneho di Adikshon. Sintá mei mei di su tambúnan, i trahando tambú mientrastantu, Pincho a bai bèk den su historia pa konta Djasabra kon el a kuminsá.

40 aña den tambú...

Pincho tin mas di 40 aña den tambú pero ofisialmente 40 aña den tambú. Pincho tabata e promé yu ku a nase den Brievengat bieu (na Pater Poeisstraat 8 )despues di ni un aña el a bai biba na Willem Hoyerstraat 20. For di chikí Pincho tabata move den tokamentu i kantamentu di tambú pero un poko skondí pasobra su mayornan tabata masha strèn. Pincho su tawela i tio tabata hopi bezig ku kultura di Kòrsou. Nan tabata toka tambú, traha den kunuku i tambe organisá seú. Pues Pincho a lanta for di chikí den tambú i einan su interes pa tambú a lanta.

I awe e ta komprondé dikon nan tabata strèn asina. Awe e por mira hopi di e gainan ku el a bai skol kuné ku awe ta asta su propio klientenan na FMA, hopi no tei mas. I e ora ei bo ta mira dikon bo mayornan ta asina strèn. “E tempu ei mi tabata rabia yora i zundra pasobra mi amigunan si por a bai, pero awe yen no tei mas, vários ta den droga òf den Capriles i p’esei awe mi ta komprondé mi mayornan su aktitut pa ku mi”. Pincho a kaba LTS na aña 1977 i 15 di sèptèmber 1977 el a sali ku su grupo di tambú.

Su promé grupo di tambú tabata yama Topogiogo. “Mi tabatin bèrgwensa di usa mi mes nòmber. Tabatin Ralph i Rolando Brunken i nan tabata toka tambú i chapi i Ralph ta imitá Topogiogo i p’esei nos a yama e grupo asina. Un aña despues nos a bai toka na bar Rayo del Sol na Monrepos i einan un hòmber a bisa nos ku nos ta venenoso i nos a kambi’e hasié grupo venenoso. I despues el a bira Pincho i su grupo”.

Na 1991 e grupo a bira un fundashon kargando e nòmber FUNDASHON PINCHO I SU GRUPO (F.U.P.I.). Akinan Pincho a bin amplia su mes mas tantu i asina kombertí su mes den un multifasétiko kultural, dor ku el a bai na dediká su mes na siña hóben nan diferente disiplina manera baile di seú, tambú i kaha di òrgel. Tambe FUPI a bai mas den grandi dor di organisá na seis okashon Festival Kantika di tambú i partisipá den marcha di Karnaval pa sinku aña largu.

Un idea ku Pincho a gusta mas e tempu ku nan a bai kuné tabata TULA. Aki e grupo a disfrasá na e tempu di sklabitut, nèt den e temporada ku Harry Zimmerman a kanta e tumba TULA den festival di tumba.

Na 1991 FUPI ku a pone su promé show en kombinashon ku un atardi mehikano.

E nòmber Pincho a sali di kas anto den tambú el a bira Pincho.

Asina e nòmber a sigui desaroyá te ku e nòmber a bin pega te e dia di awe. Asina Pincho a keda kosechá tantu popularidat riba tereno kultural i tambe komo maestro di seremonia.

Un aktividat ku Pincho ta gusta mashá ta Batimentu di huda. Edwin Bernadina, mihó konosí komo Basilel, ta esun ku tabata organisá e aktividat aki, pero tiki tiki el a bin kaba na nada. Pincho a haña ku e aktividat aki ta unu importante di nos kultura i no tabata ke pa e bai pèrdí. Asin’aki el a tum’é ofer for di Basilel i den temporada di seú e ta un di e aktividat nan mas grandi ku tin. Debí na diferente faktor nan Pincho tambe a bin stòp ku batimentu di Huda i a entregá batuta na Fabian Martina. Dor di su obra nan di man i aktividat nan kultural Pincho a yega di gana diferente premio riba tereno kultural.

Sr. Pincho Anita ta tata di kuater yu, di kual tres ta muhé i un hòmber. E tin 10 aña trahando na F.M.A. yudando adikto nan. Banda di esei e ta duna masashi i kita doló bieu for di kurpa di hende usando sabiduria di naturalesa.

Tambe komo Pincho i su grupo tabata tin diferente premio ku nan a gana. Manera tres premio Galardon Vitrola i kuater Riba Tarima Award. Den sòftbòl di basilon tambe Pincho i su grupo a buta drama, nan a sali e tim ganadó lagando Pachi Damon den tereno. Te awe nan ta buska e bala. Tur aña tin un CD nobo. E intenshon di Pincho i su grupo ta pa sigui informá i forma e hóben nan riba tereno kultural. Pincho i su grupo no ta un grupo ku ta toka tur dia ni tur siman, pero kada un ta un!

Tokamentu....

Pincho ta konta ku tempu el a kuminsá toka tambú, ta un di e gainan tabata bin ku tambú di su tata pa nan toka i ora e no bin, no por toka tambú tampoko. I asina tambe e historia di trahamentu di tambú a kuminsá. Pincho a bisa ku e no ta toka manera otro gruponan masha tempu mas. Normalmente nan ta toka ku 9 hende pero e ta toka tin biaha ku 6 pasobra e no ta haña dikon mester di tantu hende asina. Pincho no ta toka snèknan asina tantu mas, pero mas bien riba invitashon i na fiestanan. El a bisa sigur 15 pa 20 aña pasá el a mira e situashon ta bin. “Ora bo toka na snèk, kon e snèk ta hasi paga bu si tur hende ta bin ku nan kos di bebe den baul di outo. Na final ora bo kaba tabatin yen hende pero e snèk no a bebe. Si mi toka na snèk mes, mi mester wòrdu pagá delantá i no ku mester stèns riba benta pa asina wòrdu pagá” asina Pincho a bisa Djasabra. I esaki no ta pa tambú so, pero pa tur aktividat ku tin. Pincho i su grupo ta toka mas pa hasimentu di aña i selebrashon i si e toka na snèk mes mester ta pago adelantá pasobra tin tokadó ku tin di kobra.

Pincho sa toka tambú, pero e ta kanta mas tantu i ta skibi tambú. E tabata organisá tambú ántes pero asuntu di pèrmit ta un poko doló di kabes, ounke e no tabatin masha problema ku esaki nunka, pero e pèrmit ta bin muchu lat.

Releks ku tambú....

Hopi hende ta wak tambú komo algu negativo pero esaki no ta e tambú riba su mes pero ta mas bien e generashon ku ta kambiando. Generashonnan a kambia den tur aspekto i den tambú tin un lus èkstra. Ora tende tambú ta pensa negativo pero tambú ta dushi, tambú ta kita strès, ku tambú bo ta benta tur loke bo ke afó. Relahá i laga bai! Ora Pincho ta kanta e ta wak problema delantá i e mester por friu pero lamentablemente e hóbennan awendia no ta mir’é. Si mi ta kantando algu i e bira kayente ta bin a kambi’é i fria e hendenan i asina bo ta yuda e kousa di tambú.

Inspirashon....

Pincho su inspirashon ta di su kabes pa su boka!, asina el a bisa Djasabra. Ken ta kòrda Jadim, baga dim bam bam. Ta un vürwèrk ku ta bula asta bo pòtmòni te den bo saku di karson.

Ta esei ta dushi di tambú, bo ta hunga ku palabra i esei tambe ta e problema di últimamente serka e hóbennan, nan ta kanta bo nòmber fam kiko bo tin bistí i tur kos. “Mi mester por kanta bu sin ku bo sa ku ta bo”, asina Pincho a bisa Djasabra. “Ora bo sinti e kos ei mi ta leu ta bai tambe. Mi no ta menshoná niun nòmber i esei ta e arte ku tin di usa”. Pincho por improvisá mashá. “Na mucha nos a baila tròm masha hopi pero na grandi bo brasa ta bira steif sino lo mi a bai Punda bai baila Tròm”.....ku sonrisa riba su kara...esun ku komprondé sa di kiko Pincho ta papia. “Awor aki mes mi mester di un tereno grandi, e mester ta sentral pa mi traha un ‘mutlicentrum’ na Kòrsou, mi no mester di MEO ni niun kontrol pasobra delantá bo sa ku mi ta bai bende kos kaduká”....Pincho a kant’e pa nos.

“Ta masha hopi polítiko a haña serka mi, pero mi no ta benta nòmber di niun hende. Bo tin si pone e kosnan huntu pa bo sa ta ken”. I esei ta e arte di palabra i e kaminda ku Pincho ta kana yega tur kaminda. Mesun kos ta konta pa palabranan dòbel sinti “Mi a bai buska shon Ton pero Ton ta fo”. Esei ta un tambú ku a gana premio. Pincho tin yen inspirashon i ta tiki tiki e ta manda nan.

Karpinté...

Pincho ta kòrda ku un dia ora nan a kaba toka el a skonde e barí di e amigu i lag’é bai kas sin dje. Pincho mes a bai kas ku e barí i a tòrnu esaki chikí chikí pa e mira kon ta traha tambú. E doló tabata ora di harm’é bèk, el a bringa basta kuné i a harm’é si, pero no meskos. Pero asina tambe tiki tiki el a bin siña kon ta traha tambú. Pincho ta karpinté i ounke e no ta dediká mas na su trabou na drogadiktonan, e ta traha karpinté ratu ratu. E ta traha tambú, i riba pedido e ta traha banki, mesa i hopi mas. Ounke el a baha man hopi pasobra el a haña un sla duru ku hende a drenta su lugá i limpia su tayer bai kuné. I pa esun ku ke siña Pincho ta habrí pa pasa e siñansa aki over. E ta traha tambú te ainda ounke ménos ku den pasado. E ta traha tambú kuminsando for di atendé ku e kueru, limpia e kueru, pone seka, muhé i bisti e tambú. Hopi hóben no por ku e holó di kueru i no por ku e trabou ku ta hasi man gròf “pero nan ta lubidá ku man gròf mes ta mas e pekinan ta pega manera magnet”.