WILLEMSTAD.- Den un reunion ku Promé Minister Gilmar ‘Pik’ Pisas mes a solisitá ku e Komishon di Asuntunan di Reino i Relashonnan Interparlamentario el a duna informashon riba último desaroyonan relashoná ku e Konferensia di Reino ku ta tuma lugá dianan 17 i 18 di novèmber awor. Manera kosnan ta mustra e Parlamentonan den Reino lo no tin un ròl signikativo den e konferensia.

Durante su disertashon den Parlamento na okashon di selebrashon di Dia di Outonomia, Pisas a bisa ku Kòrsou su outonomia mester alsa tambe su posishon den Reino. E deklarashonnan aki ta signikativo pa e posibel posishon ku gobièrnu lo bai asumí den e konferensia. “Si nos ta honesto ku nos mes, nos tin ku konfirmá ku nos outonomia ainda tin limitashonnan mará na dje, manera entre otro ankra den e leinan di konsenso di Reino riba tereno di hustisia i supervishon finansiero. Nos kontesta riba e pregunta kiko nos ta hasi pa eliminá e limitashonnan ei, no ta keho, sino akshon”, Pisas a bisa.

Segun Pisas, keho no ta yuda pais ku nada. “E leinan di konsenso ku ta eksistí fo’i 10-10-‘10 ta un realidat di nos struktura estatal ku nos mes a skohe p’é. Pero mas lihé nos kas ta na òrdu, ménos preshon nos lo haña di Gobièrnu di Reino i mas espasio nos lo tin pa disidí nos mes riba nos asuntunan interno. Tambe ta asina ku kooperashon den Reino no mester bira supervishon, ni dependensia, pero un instrumento pa yuda nos outonomia bira mas fuerte i resiliente, mas pronto posibel.”

El a sigui bisa: “Pero loke sea e posishon estatal di Kòrsou, nos ta un pais kompleto den Reino, ‘volwaardig’, ku pleno derecho, i no un miembro di segundo rango. Ta p’esei nos meta pa 2030 ta: un Kòrsou ku no tin mester di supervishon, pasobra e ta demostrá tur dia di nobo ku e mes por karga su responsabilidatnan di forma digno i ku e integridat nesesario. Di otro banda, nos ta spera di nos partnernan den Reino: rèspèt pa nos outonomia i igualdat entre e kuater paisnan.”

Segun Pisas, e trabou ku mester hasi riba e kuater aspektonan menshoná, no ta responsabilidat di gobièrnu so. “Mi ta pidi boso tur, inkluso miembronan di oposishon, pa nos para huntu riba e asuntunan ku ta toka interesnan sagrado di nos nashon. Ora nos yega 2030, laga ku nos por bisa ku e Kòrsou outónomo ku a kumpli 20 aña di edat ta un pais ku por karga su mes, ku ta kuida di su hendenan i ku sa kon pa karga su posishon di outonomia ku e madures nesesario, paden i pafó di Reino.”

Segun e último informashon ku a bini for di gobièrnu e Konferensia di Reino ta un konsulta atministrativo entre gobièrnunan di e paisnan outónomo di Reino. E ta enfoká riba fortifikashon di e kolaborashon entre e kuater paisnan di Reino. Durante di e konferensia kada pais lo tene su propio “State of the Nation,” na unda ku kada lider lo reflekshoná entre otro riba e éksitonan i retonan di nan pais.

Tambe lo pone énfasis riba e áreanan di maneho na unda tin oportunidat pa kolaborashonnan nobo òf mas estrecho. Kolaborashon ta di importansia esensial pa un Reino kla pa futuro. Rèspèt mutuo pa otro su posishon, konekshon mutuo i e boluntat pa sostené otro ta pilánan importante di e kolaborashon ei. “E Konferensia di Reino akí ta ofresé oportunidat pa fortalesé i profundisá lasonan entre e gobièrnunan. Ademas, e kuater paisnan ke logra mas kontinuidat i koheshon den e konsultanan periódiko entre e gobièrnunan.