WILLEMSTAD.- “Nos tin 3 aña i mei den koalishon. Semper tabatin problemanan, pero ami nunka tabata hasi fèrfelu. Djaluna último tabatin un konflikto entre frakshonnan di MFK i PNP ku a kulminá ku frakshon di MFK no ke traha den koalishon mas ku parlamentarionan pa PNP Sheldry Osepa i Gwendell Mercelina.”

Asina promé minister Gilmar ‘Pik’ Pisas (MFK) a duna di konosé djárason mèrdia despues ku a bira konosí ku koalishon MFK/PNP a yega na su final. Pisas ta atmití ku for di momento ku frakshon di MFK a pone su posishon riba mesa ku tabata bisto ku no tin un gobièrnu mas pasobra no por eksigí pa PNP ta ken ta nan parlamentarionan.

Pisas ta bisa ku e ta basta emoshoná pasobra e no tabata ke un kiebro den e koalishon ku PNP. El a trata di atendé loke ta pasando interno, pero ku frakshon di MFK tabatin problema ku sierto parlamentarionan di PNP tabata konosí.

E lider polítiko di MFK a usa un pregunta Mercelina a hasi den reunion djaluna último, esta ki mishi nòmber di minister di Finansa pa MFK, Javier Silvania menshoná den Panama Papers, pa ilustrá e problemanan ku frakshon di MFK tin ku e parlamentarionan pa PNP. Den e kuadro aki el a mustra ku ta importante tambe ku MFK ta duna oido na su parlamentarionan.

Un punto di bista ku lider polítiko di partido Nashonal, Ruthmilda Larmonie-Cecilia tambe tin pa su propio partido indikando ku no por permití otronan disidí ken por ta parlamentario pa PNP. Esaki tabata motibu tambe pa PNP a disidí ku e no por sigui mas den e koalishon.

Presidente di partido MFK, Sithree Van Heydoorn tambe ta lamentá e kiebro ku partido PNP. E no ta haña e situashon unu agradabel i a bisa ku 3 aña e tabatin un bon relashon di trabou ku PNP na nivel di minister.

Mayoria

Relashoná ku kon ta bai sigui Pisas a indiká ku ku ta kestion di sea buska pa forma un mayoria nobo òf yama elekshon. Den e kuadro aki Pisas kompaña pa ministernan a kana bai parlamento pa bai “papia” ku frakshonnan.

El a indiká ku e kosnan no ta asina leu ku formashon di un mayoria nobo manera ya tabata bai rònt den diferente notisia riba retnan sosial. Den e notisianan aki ta trese dilanti ku tantu partido KEM komo miembro independiente di parlamento, Zita Jesus-Leito lo djòin MFK i forma un mayoria.

EXTRA tambe a haña diferente informashon di fuentenan verídiko ku ta indiká asta ku tin kartanan firmá kaba pa 12 miembro di parlamento ku lo bai pa presidente di parlamento i gobernadó. Lider polítiko di KEM, Michelangelo ‘Low’ Martines den un entrevista a bisa ku KEM semper ta pará kla pa drenta den gobernashon ku MFK.

Minister Charles Cooper (MFK) tin tur konfiansa ku ta bai logra MFK pa firma un mayoria nobo. El a pidi pueblo keda trankil miéntras ku e tambe ta pretendé ku ta awor ta bai sondia ta kiko ta e posibilidatnan.

Foto:

...Promé minister Gilmar Pisas...