WILLEMSTAD.- Un hòmber piskadó ku a bira malu riba laman, a fayesé. Citro a duna asistensia na trese e boto kantu.

Ayera pa 10.47 ora CITRO a risibí notifikashon di Wardakosta ku na parti nort di Kòrsou tin un boto di piskadó ku dos persona na bordo ta drif ku problema ku motor, 3 mia for di Ostpùnt. Mesora CITRO ta drenta den akshon ku su boto C-Rescue 1 pa bai tou e boto. Na altura di Hambrak boluntarionan di Citro ta tende via radio ku e piskadó ta pidi asistensia médiko inmediato pa su kompañero, pasobra esaki a bai flou. Laman tabata hopi brutu na kosta nort. Na yegada serka e boto di piskadó 2 boluntario a subi na bordo di e boto di piskadó i mesora a kuminsá ku reanimashon di e piskadó ku a bai flou. Nan por a ehersé esaki pa mas o ménos 20 minit en espera di e dòkter di marina ku tabata na bordo di e Stationschip i ku tabata bini for di bahia di Sta. Ana. Miéntras boluntarionan di CITRO ainda tabata trahando ku e piskadó, C-Rescue 1 a kuminsá tou e boto pa por a yega den laman mas kalmu.

Mientrastantu tambe e helikòpter di Wardakosta tambe a yega na e sitio, en espera pa eventualmente evakuá e piskadó. Despues ku e dòkter di Marine a subi e boto di piskadó, esaki a sigui ku reanimashon, usando tambe e aparatonan ku e tabatin huntu kuné.  Desafortunadamente esaki no a yuda.

CITRO mes tambe mester a saka nan boto Dick Braakman pa bai sigui tou e boto di piskadó den e laman brutu. Den tipo di kasonan asin’aki, ora ku laman ta hopi brutu, e kapasidat pa tou di e boto Dick Braakman ta muchu mas grandi ku esun di C-Rescue 1. Asina Dick Braakman a tou e boto te den bahia di Spaanse Water. Ora a yega den Spaanse Water a pasa e kurpa ya sin bida for di e boto di piskadó ku Dick Braakman tabata tou, pa C-Rescue 1. A hasi esaki pasombra mesora ku yega Caracasbaai ta pone C-Rescue1 riba trailer i drenta esaki den e kas di boto di CITRO. Esaki ta garantisá privasidat pa e famia.

Den e kas di boto dòkter di polis tabata presente pa tuma e kurpa sin bida for di e dòkter di marina i a konstatá ofisialmente ku el a fayesé. Despues ku a kumpli ku tur formalidat, famianan a haña chèns di tuma e kurpa ya sin bida di nan ser kerí den privasidat di e kas di boto di CITRO.

Kolaborashon entre Wardakosta, Marina Real i e organisashon di reskate CITRO durante e operashon di reskate aki tabata hopi bon, desafortunadamente e resultado tabata hopi tristu.

Despues ku tur formalidat a tuma lugá tambe boluntarionan di CITRO tambe a haña guia di en dòkter di CITRO durante e debriefing pa desahogá nan mes pa motibu di e resultado troumítiko di e reskate aki.

CITRO ta deseá famia di e piskadó hopi forsa den en dianan aki pa karga ku e pèrdida di nan ser kerí.

Mester bisa ku ayera tambe mas despues un hòmber turista a bira malu na Klein Kòrsou  i e helikòpter di Zeeland a transportá e hòmber pa área di Rif i for di aki ambulans a buska e turista hib’é hospital pa tratamentu.