WILLEMSTAD.- Un biaha mas piskadónan di shut ta rabiá i a sera kaminda pa trùknan ku awa di fekalia i kímiko bai basha esaki na laman di Shut. E piskadónan a indiká na prensa ku nan ta kansa di e akto aki, i nan no por traha nan pan di kada dia. Pasombra na e sitio aki nan ta piska. Si basha e sushi, esaki ta kore ku e piskánan ku ta yega kosta.

Despues di a konstatá ku kosta tabata sushi, nan a disidí di blòkia entrada pa bai laman di Shut. Nan a pone frishidèr bieu i otro ophetonan den kaminda i asina impedí e trùknan di sigui bai na e laman. Mester a yama polis pa por a kalma e piskadónan i ku a habri e kaminda pa e trùknan pasa bai e laman. Pero e piskadónan a indiká ku si atrobe konstatá ku kosta ta sushi, nan lo sera kaminda. Si trùk ku zeta bolbe yega na Shut pa basha esaki na laman, nan lo blòkia e kaminda.

“Polis lo mester keda bai bin, si e kos aki no kaba”, e piskadónan a bisa. E piskadónan indiká di a reuní ku minister di salubridat sra. Jesus-Leito ku a pidi mas tempu pa atendé e situashon.  Pero e tempu a yega, i a disidí blòkia e portanan. E piskadónan a mustra riba un bòrchi na entrada di Shut ku ta indiká pa kiko e área aki ta sirbi. Tin entre otro ku e área ta unu pa deporte, rekreashon i piskamentu. Ta prohibí pa deshasí di deskargo i otro produktonan ku por hasi daño riba bida bou di awa i riba tera.

E piskadónan ta kere ku awor si e kloaka ku ta situá algun meter leu, mester keda habri pa e trùknan por benta nan sushi aden. EXTRA a pasa na e sitio, i por mira ku e sistema di deshasí di awa di fekalia i otro produktonan tei, pero porta ta sera ku bewaker.