ORANJESTAD.- Ayera e Sentro di Operashon Marítimo di Wardakosta a haña un notifikashon di un boto di piskadó lokal ku tabata pèrdí riba laman. Abordo di e boto tabata tin dos hòmber lokal ku a sali pa laman djárason mainta. E hòmbernan mester a regresá kas djárason anochi, pero no a regresá kas. E famianan di e piskadónan pèrdí a tuma kontakto ku Wardakosta pa hasi un búskeda pa e dos hòmbernan.
Mesora despues di e notifikashon, Wardakosta a lansa un helikòpter ku a start un búskeda aéreo buskando e hòmbernan riba e boto. Djaweps atardi a haña un vèst di salbabida, un tas i un tanki di gasolin na altura di Bachelor Beach, ku ta kere ku tabata pertenesé na e boto Mila kual tabata pèrdí. Wardakosta tambe a dirigí un drone i e cutter Jaguar pa asistí ku e búskeda.

E búskeda a keda anulá den oranan di anochi debí na e skuridat. Djabièrnè mainta tempran a kuminsá ku e búskeda bek na kual momento e drone a konstatá un kurpa ku no tabata duna señal
di bida na Bachelor Beach.
Despues di un ratu, a konstatá un kurpa mas ku no tabata duna señal di bida riba e mesun beach. E kurpanan ku no tabata duna señal di bida a wòrdu identifiká komo e dos piskadónan lokal pèrdí. E kurpanan a wòrdu entrega na Kuerpo Polisial Aruba pa mas investigashon. Wardakosta ta deseá famia i amigunan di e hòmbernan hopi forsa.