WILLEMSTAD.- Un planta nobo pa kima shushi na Landfill lo produsí sufisiente energia pa asina suministrá Wechi parsialmente ku koriente.  E kantidat di koriente ta pa uso básiko i no pa suministrá henter e bario nobo ku mester lanta na e sitio. Por ehèmpel mester pensa riba pòmpnan i otro artefaktonan ku mester di koriente básiko.

Mañan mainta lo habri e planta nobo aki di kima shushi na Landfill ku lo ta un poko mas grandi ku esun anterior ku ya kaba a pasa tempu. Kosto di e planta nobo ta den kareda di 2 mion florin. E planta anterior a traha mas ku 15 aña i tabata destiná pa kima entre otro shushi médiko, animalnan morto i droga. Esun nobo lo sigui hasi mesun kos pero lo traha 24 ora pa dia. E kalor di e planta lo generá sierto grado di energia ku por usa pa Wechi, segun direktor di Selikor, Wesley Kook a duna di konosé.

Kook a bisa ku e proyekto ta kuadra ku e pensamentu di Selikor pa traha mas tantu posibel teniendo kuenta ku medio ambiente. Di un banda ta kima desecho pero einan mes ta fomentá un energia limpi ku ta na bienestar di nos isla. Pa loke ta trata e posibilidat di un planta mas grandi, Selikor a bisa ku pronto lo hasi un estudio riba esei. Pero un planta grandi ta kosta hopi mas sèn. Segun e último datonan disponibel, esei ta riba 100 mion florin. Niun pais di Caribe tin un planta asina aki. Huntu ku ekspertonan djafó lo hasi un estudio di kon deshasí di shushi na Kòrsou. Despues di e informe lo tuma e desishonnan korespondiente, asina e direktor di e kompania di limpiesa a bisa. E estudio lo ta enkabesá pa e instituto di renombre di Ulanda, TNO.

Den kurso di mañan lo duna mas informashon riba kiko e pensamentu di e kompania ta. Lo ta presente tambe Aqualectra ku tambe tin den su afan pa Kòrsou produsí mas "bèrdè" i representantenan di Fundashon Kas Popular. Ya kaba kasi 30 porshento di e produkshon di Aqualectra ta usa sistemanan alternativo, manera energia di bientu.

Kòrsou ta moviendo riba e tereno di energia "bèrdè". Resientemente a anunsiá akuerdonan importante pa produkshon energia ku awa friu di profundidat di laman pa e área di Zaquitó. E proyekto ei, anunsiá anteriormente e aña aki, ta avansando awor ku a sera akuerdonan ku diferente lokalidat den e área.