WILLEMSTAD.-  Tim di Mantenshon di Órden Públiko un biaha mas a sa di desplegá un tremendo trabou despues di a kanta bingo den área di Ronde Klip.

Ayera for di mainta trempan alrededor di mitar di dies Tim di Mantenshon di Órden Públiko konhuntamente ku UST, a tene un entrada hudisial na un kas den área di Ronde Klip.

Esaki en konekshon ku violashon di  Lei di Opio i  Lei di Arma di kandela. Durante di e investigashon na  e adrès en kestion, polis a haña i konfiská tres plantashon di mata di mariwana enorme.

Ta trata aki di 8238 mata di mariwana i vários atributo  pa prosesá droga. Na e sitio a asta haña un instalashon ilegal di awa limpi ku ta keda usa na e plantashon.

Por a mira ku e sitio ta unu regularmente bishita mirando ku tabatin asta un kasita di palu traha. Tur e matanan i tambe tur e atributonan pa prosesá mariwana a keda kima na e sitio mes.

Investigashon den e kaso aki ta kontinuá.